وزیراعلیٰ پنجاب مریم نواز نے ایکسپو سنٹر میں تقریب سے خطاب کرتے ہوئے کہا کہ میری کوشش ہے کسی کو حکومت کے پاس نہ جانا پڑے،حکومت خود عوام کے پاس جائے، مجھے اچھا نہیں لگتا تھا کہ لوگ آٹے کا تھیلا اٹھا کر جا رہے ہوتے تھے، الحمد اللہ 30لاکھ خاندانوں کو راشن پیکٹ ان کے گھر تک پہنچایا، اللہ تعالیٰ نے آپ کو چنا ہے عوام کی خدمت کے لئے اپنی دنیا اور آخرت بنائیں۔
تفصیلات کے مطابق مریم نواز شریف کا کہناتھا کہ پاکستان کے پاس ایٹم بم ہے،یہ ایٹم بم پاکستان کو کس نے دیا؟ نواز شریف نے پاکستان کو ایٹمی طاقت بنایا، تمام سیاسی جماعتیں ایک قوم کی صورت میں افواج کے ساتھ کھڑی ہیں، سیسہ پلائی دیوار کی مانند ہماری افواج سرحدوں کی حفاظت کر رہی ہیں، پاکستان کا دفاع ناقابل تسخیر ہے، بھارت کا خطرہ موجود ہے،افواج پاکستان اور ہم ایک ساتھ کھڑے ہیں۔
انہوں نے کہا کہ کم از کم اجرت 37 ہزار کی ملنی چاہیے،ماضی میں اعلان ہوتا تھا لیکن عمل نہیں، محنت کش ملک کے ماتھے کا جھومر ہیں، حلف اٹھایا تو رمضان المبارک میں لوگوں کارش دیکھنا مناسب نہیں لگا، 30لاکھ سے زائد خاندانوں کے مستحق افراد کو گھروں میں راشن دیا، ضرورت مند ہمارے پاس چل کر نہیں آئیں گے،ہم ان کے پاس جا کر مدد کریں۔
ان کا کہناتھا کہ کبھی نہیں ہوا 25 تیس روپے سے روٹی 12 روپے پر واپس آئی ہو، ایسانہیں کہ پنجاب کے پاس پیسے یا وسائل زیادہ ہیں، تمام صوبوں کو این ایف سی ایوارڈ کے تحت وسائل ملتے ہیں۔
