عالمی شہرت یافتہ کرپٹو ایکسچینج بائنانس کے بانی چانگ پینگ ژاؤ، جنہیں دنیا بھر میں "سی زیڈ" کے نام سے جانا جاتا ہے، کو پاکستان کرپٹو کونسل کا اسٹریٹجک مشیر مقرر کر دیا گیا ہے۔
اس اہم تقرری کا باضابطہ اعلان اسلام آباد میں ہونے والی ایک اعلیٰ سطحی ملاقات کے دوران کیا گیا، جس میں سی زیڈ اور پاکستان کرپٹو کونسل کے نمائندگان شریک ہوئے۔ اجلاس کی صدارت وفاقی وزیر خزانہ و محصولات سینیٹر محمد اورنگزیب نے کی۔
ملاقات میں چیئرمین سیکیورٹیز اینڈ ایکسچینج کمیشن آف پاکستان (ایس ای سی پی)، گورنر اسٹیٹ بینک، اور وزارت قانون و آئی ٹی کے سیکریٹریز بھی شریک ہوئے۔ اجلاس کا مقصد پاکستان میں کرپٹو کرنسی اور بلاک چین ٹیکنالوجی کے فروغ کے لیے حکمت عملی وضع کرنا تھا۔
اپنے دورہ پاکستان کے دوران، سی زیڈ نے وزیراعظم اور نائب وزیراعظم سے بھی الگ الگ ملاقاتیں کیں، جن میں انہوں نے کرپٹو صنعت میں سرمایہ کاری، ضابطہ سازی، اور ٹیکنالوجی کے شعبے میں تعاون پر تبادلہ خیال کیا۔
سی زیڈ کی تقرری سے ملک میں کرپٹو اثاثوں سے متعلق پالیسی سازی، تعلیم و آگاہی، اور عالمی سطح پر تعاون کے نئے دروازے کھلیں گے۔ یہ اقدام پاکستان کی ڈیجیٹل معیشت کے فروغ میں ایک اہم سنگ میل ثابت ہو سکتا ہے۔
سی زیڈ کی عالمی ساکھ اور کرپٹو ٹیکنالوجی میں مہارت سے فائدہ اٹھا کر پاکستان عالمی کرپٹو مارکیٹ میں ایک مؤثر کردار ادا کر سکتا ہے۔
