وزیراعظم شہباز شریف نے عید الفطر کے موقع پر ترکمانستان کے صدر سردار بردی محمدوف، قازقستان کے صدر قاسم جومارت، بحرین کے بادشاہ حمد بن عیسیٰ الخلیفہ، بنگلہ دیش کے چیف ایڈوائزر ڈاکٹر محمد یونس اور ایران کے صدر مسعود پزشکیان سے ٹیلیفونک رابطہ کر کے عید کی مبارکباد دی۔
ان رابطوں کے دوران دوطرفہ تعلقات کو مضبوط کرنے اور اعلیٰ سطحی وفود کے تبادلے جاری رکھنے پر اتفاق کیا گیا۔
ترکمانستان کے صدر اور قومی رہنما گربنگولی بردی محمدوف کو مبارکباد دیتے ہوئے وزیراعظم نے دوطرفہ تعلقات کی مثبت پیشرفت کو حوصلہ افزا قرار دیا اور انہیں جلد پاکستان کے سرکاری دورے کی دعوت کا اعادہ کیا۔
بحرین کے بادشاہ سے گفتگو میں شہباز شریف نے پاکستانی برادری کی میزبانی پر شکریہ ادا کیا جبکہ شاہ حمد نے پاکستانی عوام کے لیے نیک تمناؤں کا اظہار کیا اور انہیں بھی دورہ پاکستان کی دعوت دی گئی۔
قازقستان کے صدر سے بات چیت میں زراعت، معیشت، تجارت اور سرمایہ کاری میں تعاون بڑھانے پر زور دیا گیا جبکہ مئی میں قازق وفد کے دورہ پاکستان اور رواں سال کے آخر میں صدر قاسم کے دورے کا ذکر بھی کیا گیا۔
بنگلہ دیش کے چیف ایڈوائزر ڈاکٹر یونس سے رابطے میں وزیراعظم نے تجارت اور سیاحت میں بہتری پر اطمینان کا اظہار کیا اور ثقافتی وفود کے تبادلے کی تجویز پیش کی، ساتھ ہی انہیں پاکستان کا دورہ کرنے کی دعوت دی۔
ایران کے صدر سے گفتگو میں شہباز شریف نے گہرے برادرانہ تعلقات پر زور دیتے ہوئے تجارت بڑھانے، سرحدی سلامتی کے چیلنجز سے نمٹنے اور دوطرفہ تعاون مضبوط کرنے کے عزم کا اعادہ کیا۔
انہوں نے ایرانی عوام، صدر اور سپریم لیڈر کو بھی عید کی مبارکباد پیش کی۔
