وزیر اعظم پاکستان کی زیر صدارت اسلام آباد میں ایک اعلیٰ سطحی اجلاس منعقد ہوا، جس میں بٹ کوائن مائننگ اور حقیقی اثاثوں کی ٹوکنائزیشن میں اسٹریٹجک سرمایہ کاری پر غور کیا گیا۔ یہ تاریخی اجلاس پاکستان کی ڈیجیٹل معیشت کو اپنانے اور بلاک چین ٹیکنالوجی کا عالمی مرکز بننے کے عزم کا اظہار ہے۔
اجلاس میں نمایاں شرکاء میں نائب وزیر اعظم و وزیر خارجہ محمد اسحاق ڈار، وزیر خزانہ محمد اورنگزیب، وزیر آئی ٹی شزا فاطمہ خواجہ، اسٹیٹ بینک آف پاکستان کے گورنر جمیل احمد، پاکستان کرپٹو کونسل کے سی ای او بلال بن ثاقب، وزیر اقتصادی امور احد خان چیمہ، وزیر پٹرولیم علی پرویز ملک، وزیر توانائی سردار اویس احمد خان لغاری، وزیر برائے موسمیاتی تبدیلی ڈاکٹر مصدق ملک، اور چیئرمین ایف بی آر راشد محمود شامل تھے۔
اجلاس میں جینیسس گروپ، جو کہ دنیا کی سب سے بڑی بٹ کوائن مائننگ کمپنیوں میں سے ایک ہے اور اب تک ایک ارب ڈالر سے زائد مالیت کے بٹ کوائن مائن کر چکی ہے، کے بانی و سی ای او مارکو اسٹرینگ اور شریک بانی و سی ای او ڈاکٹر مارکو کرون بھی شریک تھے۔ مزید برآں، پولی میتھ کینیڈا کے سی ای او ونسنٹ کادار، جو کہ محفوظ اور قانونی طور پر اثاثوں کی ٹوکنائزیشن کے عالمی ماہر ہیں، نے بھی اجلاس میں شرکت کی۔
ان کمپنیوں کے نمائندوں نے پاکستان میں 3.5 بلین ڈالر کی مضبوط بٹ کوائن مائننگ انفراسٹرکچر کی تعمیر اور جامع اثاثوں کی ٹوکنائزیشن کے منصوبے شروع کرنے کے لیے قابل عمل حکمت عملیوں کا خاکہ پیش کیا۔ مباحثے میں بلاک چین ٹیکنالوجی کی بے پناہ صلاحیت کو اجاگر کیا گیا، جس سے پاکستان کی معیشت کو استحکام، براہ راست غیر ملکی سرمایہ کاری کے فروغ، اور مالیاتی نظام کو شفاف اور جدید بنانے کے مواقع حاصل ہو سکیں گے۔
وزیر اعظم پاکستان نے پاکستان کرپٹو کونسل کو ہدایت کی کہ وہ فوری طور پر ان کمپنیوں کے ساتھ مل کر ایک عملی منصوبہ تیار کرے تاکہ بٹ کوائن مائننگ اور مختلف شعبوں میں اثاثوں کی ٹوکنائزیشن کا فوری آغاز کیا جا سکے۔
مزید برآں، وزیر اعظم نے کرپٹو کرنسی کے حوالے سے قانونی فریم ورک کو باضابطہ شکل دینے کے لیے فوری اقدامات کرنے کی بھی ہدایت کی۔
پاکستان کرپٹو کونسل کے سی ای او بلال بن ثاقب نے اس موقع پر کہا، "پاکستان کاروبار کے لیے تیار ہے۔ ہم عالمی کمپنیوں کو دعوت دیتے ہیں کہ وہ بٹ کوائن مائننگ، ڈیٹا سینٹرز، اور حقیقی اثاثوں کی ٹوکنائزیشن میں سرمایہ کاری کریں۔ یہ اختراع کاروں، سرمایہ کاروں اور بنیادی ڈھانچے کے معماروں کے لیے ایک موقع ہے — پاکستان ڈیجیٹل معیشت میں قیادت کرنے اور ویب 3 انقلاب کا علاقائی مرکز بننے کے لیے تیار ہے۔"
یہ اقدام پاکستان کو کرپٹو دوستانہ ممالک کی صف میں آگے لے جائے گا اور بلاک چین ٹیکنالوجی کی بے پناہ صلاحیتوں سے استفادہ کرتے ہوئے معیشت کی ترقی، شفافیت اور عالمی مسابقت کو فروغ دے گا۔
