سعودی عرب کے شہر مکہ مکرمہ میں رمضان المبارک کے دوران عمرہ زائرین کی نگرانی کیلئے 200 اسمارٹ اسکرینز نصب کردی گئیں۔
غیر ملکی میڈیا کے مطابق سعودی حکام نے رمضان المبارک کے دوران عمرہ کیلئے زائرین کی بڑھتی ہوئی تعداد کے پیش نظر سیکیورٹی انتظامات مزید سخت کردیئے ہیں، اس سلسلے میں مکہ مکرمہ کے مرکزی کنٹرول سینٹر میں 200 سے زائد اسمارٹ اسکرینز نصب کی گئی ہیں۔
رپورٹ کے مطابق بڑی اسکرینز کی تنصیب شہر میں جاری آپریشنز کی براہِ راست نگرانی اور انتظام میں مدد فراہم کرے گی، یہ جدید ترین مرکز حرم اور دیگر اہم مقامات پر سیکیورٹی منصوبوں کے نفاذ اور ہم آہنگی میں کلیدی کردار ادا کر رہا ہے۔
رپورٹ میں بتایا گیا ہے کہ یہ نظام زائرین کی آمد، نقل و حرکت اور روانگی کو یقینی بنانے کیلئے ترتیب دیا گیا ہے، تاکہ ہجوم کے بہاؤ کو محفوظ رکھا جاسکے اور کسی بھی ہنگامی صورتحال کا فوری جواب دیا جاسکے۔
میڈیا کے مطابق کنٹرول سینٹر مکہ مکرمہ میں 11 اہم داخلی راستوں کے علاوہ 8 سے زائد داخلی سیکیورٹی چیک پوائنٹس کی نگرانی کرتا ہے، سیکیورٹی کے مختلف امور کو 7 مخصوص شعبوں میں تقسیم کیا گیا ہے، جس کی بدولت پورے شہر میں سیکیورٹی انتظامات کو مربوط انداز میں چلایا جاسکتا ہے اور تمام ترقیاتی مراحل کو براہ راست مانیٹر کیا جاسکتا ہے۔
رپورٹ میں بتایا گیا ہے کہ یہ جدید مرکز 24 گھنٹے فعال رہتا ہے اور رمضان المبارک کے دوران سیکیورٹی انفراسٹرکچر کا ایک اہم حصہ ہے، اس کے ذریعے حکام زائرین کے بہاؤ کو ٹریک کرسکتے ہیں، ہجوم کی گنجائش کو مانیٹر کرسکتے ہیں اور کسی بھی ممکنہ واقعے پر فوری ردعمل دے سکتے ہیں۔
