جنوبی وزیرستان اپر اور لوئر کے ڈپٹی کمشنرز نے صبح سے نافذ کرفیو ختم کرنے کا اعلان کر دیا ہے۔
دونوں اضلاع کی انتظامیہ نے بتایا کہ صبح 6 بجے سے شام 6 بجے تک بند رہنے والے تمام راستوں کو اب ٹریفک کے لیے بحال کر دیا گیا ہے۔
انتظامیہ کے مطابق متعدد بند راستوں کو ٹریفک کے لیے کھول دیا گیا ہے۔
ڈپٹی کمشنر ناصر خان نے کہا کہ زالئی سے نیو کیڈٹ کالج وانا تک سڑک اور تنائی، سرویکئی، جنڈولہ روڈ کو ٹریفک کے لیے کھول دیا گیا ہے، اسی طرح وانا گومل زام روڈ آج سارا دن مسافروں اور ٹریفک کے لیے کھلا رہا۔
ڈپٹی کمشنر سلیم جان کے مطابق، احمد وام سے کوٹکئی تک کا روڈ بھی ٹریفک کے لیے بحال کر دیا گیا ہے۔
دونوں ڈپٹی کمشنرز نے واضح کیا کہ کرفیو سیکورٹی خدشات اور تھریٹس کے پیشِ نظر نافذ کیا گیا تھا لیکن اب حالات بہتر ہونے کے بعد راستوں کو کھولنے کا فیصلہ کیا گیا ہے۔
