وزیر اعلیٰ خیبرپختونخوا علی امین خان گنڈاپور نے کہا ہے کہ پولیس اور سیکیورٹی فورسز بہادری سے صوبے میں دہشت گردی کا مقابلہ کر رہی ہیں۔
وزیر اعلیٰ علی امین گنڈا پور نے پشاور سے جاری بیان میں کہا کہ کا خیبر پختونخوا کے مختلف اضلاع میں دہشت گردی کے واقعات رونما ہوئے ہیں۔ کرک پولیس نے دہشت گردوں کے حملے کو بہادری کے ساتھ پسپا کیا۔
علی امین گنڈا پور نے دہشت گردی واقعات میں شہید ہونے والے اہلکاروں کے لیے دعائے مغفرت کی ۔ کہا کہ شہیدوں کی قربانی کبھی رائیگاں نہیں جائے گی۔ دہشت گردی کے خلاف پولیس اور سیکیورٹی فورسز کی قربانیوں کی لازوال داستانیں قائم ہیں،پولیس اور سیکیورٹی فورسز دہشتگردی کا مقابلہ عوام کے تعاون سے کررہے ہیں۔
علی امین گنڈاپور نے کہا کہ مالی مشکالات کے باوجود پولیس کے لیے اربوں روپے مختص کیے گئے ہیں، سی ٹی ڈی اور پولیس کی استعداد کار بڑھانے کے لیے اسلحے اور دیگر ضروری آلات خریدے اورپولیس اہلکاروں کو پیشہ وارانہ تربیت کے لیے نئے سنٹرز قائم کیے جارہے ہیں۔ انہوں نے کہا دہشت گردی کو ختم کرنے کے لیے تمام تر وسائل بروئے کار لا رہے ہیں۔
