افغانستان کرکٹ ٹیم کے اوپنر حضرت اللہ زازئی کی بیٹی انتقال کرگئیں۔ ساتھی کرکٹر کریم جنت نے افسوسناک خبر سوشل میڈیا پوسٹ کے ذریعے مداحوں کو دی۔
افغان کرکٹر کریم جنت نے انسٹاگرام پوسٹ میں حضرت اللہ زازئی کی نومولود بیٹی کی تصویر شیئر کرتے ہوئے پوسٹ میں تعزیتی پیغام درج کیا۔
پوسٹ میں کریم جنت نے اس مشکل گھڑی میں حضرت اللہ زازئی اور ان کے اہلخانہ سے گہرے دکھ اور تعزیت کا اظہار کیا۔ انہوں نے لکھا کہ ’’میرے بھائی حضرت اللہ زازئی کی بیٹی انتقال کرگئی ہے‘‘۔
حضرت اللہ زازئی کی بیٹی کے انتقال پر کرکٹ کمیونٹی سمیت مداحوں کی جانب سے بھی گہرے دکھ اور لواحقین سے اظہار تعزیت کیا جارہا ہے۔
بیٹی کے انتقال پر حضرت اللہ زازئی کی جانب سے تاحال کوئی بیان سامنے نہیں آیا اور نہ ہی بچی کے انتقال کی وجہ بتائی گئی ہے۔
یاد رہے کہ حضرت اللہ زازئی کو آخری بار 3 ماہ قبل زمبابوے کیخلاف ٹی 20 سیریز میں ایکشن میں دیکھا گیا تھا، وہ چیمپئنز ٹرافی میں بھی افغان ٹیم کا حصہ نہیں تھے۔
حضرت اللہ زازئی نے 2016ء میں یو اے ای کیخلاف ون ڈے میچ سے انٹرنیشنل کیرئیر کا آغاز کیا تھا، وہ اب تک 16 ون ڈے اور 45 ٹی 20 میچز کھیل چکے ہیں۔
