مسابقتی کمیشن نے مصنوعی مہنگائی میں ملوث کارٹل اور گٹھ جوڑ کیخلاف تعاون حاصل کرنے والوں کو انعامات دینے کا فیصلہ کیا ہے، کسی کاروبار میں گٹھ جوڑ یا کارٹل کی نشاندہی کرنیوالے کو 2 لاکھ سے 20 لاکھ روپے تک انعام دیا جائے گا، معلومات دینے والے کا نام صیغہ راز میں رکھا جائے گا۔
پاکستان میں اشیائے ضرورت اور خدمات کی قیمتوں میں مصنوعی بڑھوتری، معیاری اشیاء کی کمی، کافی حد تک مارکیٹوں میں کاروباری گٹھ جوڑ یعنی کارٹلائزیشن کا نتیجہ ہیں، کارٹل، مارکیٹ میں موجود سپلائرز کے مابین باہمی ہم آہنگی یا ایسے معاہدے کے نتیجے میں بنتے ہیں، جس میں سپلائرز ناجائز منافع کیلئے اشیا و خدمات کی قیمتیں باہمی ہم آہنگی سے طے کرتے ہیں اور اس سلسلے میں مارکیٹ میں سپلائی کو بھی کنٹرول کرتے ہیں، جو کہ ایک غیر قانونی عمل ہے۔
مسابقتی کمیشن کے مطابق صافین کو اشیاء و خدمات کی بہتر معیار اور متناسب قیمت پر فراہمی کیلئے ضروری ہے کہ مارکیٹ میں سپلائی فراہم کرنیوالے تمام فریق صارفین کو راغب کرنے کیلئے ایک دوسرے سے بہتر سروسز اور پراڈکٹ، بہتر قیمت پر فراہم کرنے کیلئے مقابلہ میں رہیں نا کہ گٹھ جوڑ کر کے قیمتیں فکس کرلیں۔
مسابقتی کمیشن نے مزید کہا ہے کہ ناجائز منافع خوری یا اشیاء و خدمات کے معیار یا رسد پر کنٹرول کیلئے آپس میں خفیہ یا اعلانیہ معاہدہ یا سمجھوتہ کرلینا، کمپٹیشن ایکٹ 2010ء کے تحت ایک سنگین جرم ہے، کمپٹیشن کمیشن آف پاکستان نے ایسے غیر قانونی کاروباری گٹھ جوڑ اور کارٹلز کیخلاف سخت اقدامات کرنے اور ایسے کسی عمل کی اطلاع دینے کیلئے عوام اور خاص طور پر متعلقہ اسٹیک ہولڈروں سے تعاون کی اپیل کی ہے، اگر کسی شخص کو معلوم ہو کہ کسی بزنس ایسو سی ایشن یا کسی پراڈکٹ کے سپلائرز نے اپنی پراڈکٹ یا سروسز کی قیمتوں کو فکس کرنے یا سپلائی کو کنٹرول کرنے کیلئے آپس میں معاہدہ یا سمجھوتہ کیا ہوا ہے، تو ایسے عمل کی اطلاع اور معلومات فوری طور پر کمپٹیشن کمیشن آف پاکستان کر فراہم کرے۔
مسابقی کمیشن ایسے غیر قانونی کارٹل کو پکڑوانے اور ان کیخلاف کارروائی کیلئے معلومات اور کسی بھی قسم کے ثبوت فراہم کرنے پر ایسے شخص کو 2 لاکھ سے 20 لاکھ روپے تک کا انعام دے گا۔
واضح رہے کہ اطلاع و معلومات فراہم کرنیوالے کا نام خفیہ رکھا جائے گا، مسابقتی کمیشن آف پاکستان کا یہ اقدام عوامی شراکت داری کو فروغ دینے کیلئے ہے تاکہ ایسے غیرقانونی کاروباری طریقوں کا قلع قمع کیا جاسکے، کمپٹیشن کمیشن کی یہ اسکیم ناصرف ایک قانونی راستہ فراہم کرتی ہے بلکہ عوام کو اس عمل کا حصہ بننے کی ترغیب بھی دیتی ہے تاکہ وہ ملک کی معیشت اور اپنے معاشی حقوق کا تحفظ کرسکیں۔
کمپٹیشن کمیشن آف پاکستان کا مقصد معیشت میں منصفانہ مقابلے کو فروغ دینا ہے تاکہ ہر پاکستانی کو معیاری اشیاء اور مناسب قیمتوں تک رسائی حاصل ہو۔
کمیشن کا کہنا ہے کہ آئیے اپنے اندر موجود ان کالی بھیڑوں کی نشاندہی کریں اور صارفین کے حقوق کے تحفظ اور شفاف کاروباری ماحول کیلئے کمپٹیشن کمیشن کا ساتھ دیں۔
کمپٹیشن کمیشن آف پاکستان کا کہنا ہے کہ آپ سی سی پی سے فون، ای میل یا ویب سائٹ کے ذریعے رابطہ کرسکتے ہیں اور گٹھ جوڑ کی اطلاع دے سکتے ہیں، اگر آپ کی معلومات درست ثابت ہوئیں تو آپ ناصرف انعام حاصل کریں گے بلکہ آپ کو قومی ہیرو کے طور پر شناخت بھی دی جائے گی۔
