اسلام آباد میں فرانسیسی سفارتخانے کی جانب سے پی آئی اے کے سی ای او عامر حیات اور ان کی ٹیم کے اعزاز میں عشائیہ دیا گیا ہے اس موقع پر یورپی سفارتکار، ڈی جی سی اے اے اور ہوا بازی کی صنعت سے وابستہ اہم حکام نے شرکت کی۔
فرانسیسی سفیر نے پیرس کے لیے پی آئی اے پروازوں کی بحالی کو دونوں ممالک کے درمیان ثقافتی، سیاسی، سفارتی اور تجارتی تعلقات کے فروغ کے لیے اہم قرار دیتے ہوئے کہا کہ پیرس کے لیے براہ راست پروازوں سے دونوں ممالک کے درمیان روابط مزید مضبوط ہوں گے۔
فرانسیسی سفیر نے کہا کہ ہمارے سفارتکاروں نے وطن واپسی کے لیے پی آئی اے کی براہ راست پرواز کا انتخاب کیا اور اس پرواز میں فراہم کی جانے والی سہولیات سے بہت متاثر ہوئےاور پی آئی اے کی پیرس پرواز کے لیے چلائی گئی موثر تشہیری مہم کو بھی سراہا امید ظاہر کی کہ پی آئی اے جلد پیرس کے لیے اپنے آپریشن کو وسعت دے گا جس میں کم از کم ہفتہ وار تین یا چار پروازیں چلائی جائیں گی۔
سی ای او پی آئی اے عامر حیات نے فرانسیسی سفیر اور ان کی ٹیم کی کاوشوں پر ان کا شکریہ ادا کرتے ہوئے کہا کہ سفارتخانے کی خصوصی دلچسپی اور تعاون کا کوئی نعم البدل نہیں۔پی آئی اے کی پیرس کے لیے فضائی آپریشن کی تاریخ 70 سال پر محیط ہے جس میں پہلے ڈیزائنری یونیفارم سے لے کر پیرس میں ہوٹلنگ کی صنعت میں سرمایہ کاری جیسے اقدامات شامل ہیں۔
انہوں نے امید ظاہر کی کہ دونوں ممالک کے درمیان کاروباری رفاقت مزید مستحکم ہوگی اور پی آئی اے کا فضائی آپریشن اس تعلق کو مزید مضبوط کرے گا۔
