صدر مملکت آصف علی زرداری کا کہنا ہے کہ اپنے آبی مفادات کا ہرقیمت پر تحفظ کریں گے، پانی ہمارے 25کروڑ عوام کی لائف لائن ہے۔
معرکہ حق میں شاندار فتح کے ایک سال مکمل ہونے پر وفاقی دارالحکومت اسلام آباد میں پاکستان مونومنٹ پر ایک پروقار تقریب سے خطاب میں صدرمملکت نے کہا کہ بھارت نے پہلگام فالس فلیگ کو جواز بناکر بلااشتعال جارحیت کی ، پاک افواج نےپوری قوم کا سرفخر سے بلندکردیا۔
آصف علی زرداری نے کہا کہ جارحیت کےجواب میں پاکستان کا جواب سنہری حروف میں لکھا جائےگا، پاک افواج نےبھارتی جارحیت کا حیران کن جواب دیا، ہماری پاک فضائیہ نے دشمن کے 8 طیارےمارگرائے۔
قبل ازیں صدرِ مملکت آصف علی زرداری نے معرکہ حق کی پہلی سالگرہ پر قوم اور مسلح افواج کو خراجِ تحسین پیش کرتے ہوئے پیغام جاری کر دیا ہے۔
صدر مملکت نے پیغام میں کہا کہ پاکستان ایک ذمہ دار اور امن پسند ریاست ہے، دشمن کی جارحیت کا بھرپور مگر متوازن جواب دے کر دنیا کو اپنی دفاعی صلاحیت کا پیغام دیا، غیرقانونی طور پر بھارت کے زیرِ قبضہ جموں و کشمیر کا مسئلہ اقوامِ متحدہ کی قراردادوں کے مطابق حل ہونا چاہیے، پاکستان کشمیری عوام کی اخلاقی، سیاسی اور سفارتی حمایت جاری رکھے گا۔
انہوں نے کہا کہ بھارت کی جانب سے سندھ طاس معاہدے کی معطلی کی کوشش آبی دہشت گردی ہے، پانی کروڑوں پاکستانیوں کی زندگی کا مسئلہ ہے۔ افغانستان اپنی سرزمین پاکستان اور خطے کے دیگر ممالک کے خلاف دہشت گردی کیلئے استعمال نہ ہونے دے، بیرونی پشت پناہی میں سرگرم دہشت گردی کا مکمل خاتمہ خطے کے امن کیلئے ناگزیر ہے۔
ان کا کہنا تھا کہ وزیراعظم شہباز شریف اور فیلڈ مارشل سید عاصم منیر کی کوششوں سے پاکستان خطے میں توازن اور استحکام کی علامت بن کر ابھرا ہے، ایران-امریکہ تنازع کے پُرامن حل کیلئے پاکستان کی سفارتی کوششوں کو عالمی سطح پر سراہا گیا، پاکستانی قوم اور مسلح افواج ہر چیلنج کا مقابلہ کرنے اور وطنِ عزیز کے دفاع کیلئے مکمل طور پر تیار ہیں۔
