موجودہ مالی سال کے پہلے سات ماہ میں پاکستانی برآمدات میں ایک ارب ستتر کروڑ ڈالر کا اضافہ ہوا ہے ۔ ٹیکسٹائل، غذائی اشیاء اور پیٹرولیم مصنوعات کی برآمدات میں نمایاں ترقی دیکھنے میں آئی ہے ۔
رواں مالی سال کے پہلے سات ماہ میں پاکستان کی برآمدات میں نمایاں اضافہ ریکارڈ کیا گیا۔ جولائی سے جنوری کے دوران ملکی برآمدات دس فیصد اضافے کے ساتھ انیس ارب پچپن کروڑ ڈالر تک پہنچ گئیں، جو گزشتہ مالی سال اسی مدت میں سترہ ارب ستتر کروڑ ڈالر تھیں۔ٹیکسٹائل سیکٹر کی برآمدات میں دس اعشاریہ چھ فیصد اضافہ ہوا جس کے بعد یہ دس ارب ستتر کروڑ ڈالر تک جا پہنچی جبکہ گزشتہ مالی سال کے اسی عرصے میں یہ نو ارب تہتر کروڑ ڈالر تھی۔
غذائی اشیاء کی برآمدات چار ارب اکسٹھ کروڑ ڈالر تک پہنچ گئیں جس میں آٹھ اعشاریہ ایک سات فیصد کا اضافہ ریکارڈ کیا گیا۔باسمتی چاول کی برآمدات میں تین اعشاریہ تین سات فیصد اضافہ دیکھا گیا جو دو ارب انیس کروڑ ڈالر رہی۔ مچھلی۔ تمباکو۔ چینی۔ گوشت اور دیگر مصنوعات کی برآمدات میں بھی اضافہ ہوا تاہم پھلوں۔ سبزیوں۔ دالوں۔ مصالحہ جات اور آئل سیڈز کی برآمدات میں کمی ریکارڈ کی گئی۔
پیٹرولیم مصنوعات کی برآمدات پچاسی فیصد اضافے کے ساتھ تینتیس کروڑ نوے لاکھ ڈالر تک جا پہنچی جبکہ گلوز۔ لیدر مصنوعات اور دیگر مینوفیکچرنگ آئٹمز کی برآمدات میں نو اعشاریہ تئیس فیصد اضافہ ہوا۔ سپورٹس گڈز۔ فٹ بال اور کارپٹ کی برآمدات دو ارب اکاون کروڑ ڈالر رہیں جبکہ لیدر مصنوعات کی مجموعی برآمدات پینتیس کروڑ تینتیس لاکھ ڈالر سے تجاوز کر گئیں۔ کیمیکلز اور فارماسیوٹیکل مصنوعات کی برآمدات دس فیصد اضافے سے ترانوے کروڑ ڈالر تک جا پہنچی۔
