سابق کپتان بابر اعظم نے مداحوں سے اپیل کی ہے کہ کنگ شنگ بولنا ذرا کم کردیں، ہمیشہ اچھا پرفارم کرنے کی کوشش کرتا ہوں، خود اس مشکل زون سے نکلوں گا، مجھے ماضی بھولنا اور آگے دیکھنا ہے۔
پاکستان کرکٹ ٹیم کے سابق کپتان اور مایہ ناز بیٹر بابر اعظم نے جنوبی افریقا کیخلاف میچ کے بعد میڈیا سے گفتگو کرتے ہوئے کہا کہ جب بھی بیٹنگ پر جاتا ہوں مثبت پلاننگ کے ساتھ جاتا ہوں، بدقسمتی سے فنش نہیں کر پارہا، آغا اور رضوان نے بہترین اننگز کھیلیں۔
انہوں نے مداحوں سے اپیل کی کہ کنگ شنگ بولنا ذرا کم کریں، جو ٹیم نے ڈیمانڈ کی تھی اس ہی پلان پر گیا، کوشش کرتا ہوں کہ جو میری بیسٹ پرفارمنس ہو وہ دوں، جب آپ اننگ بلڈ کرتے ہیں تو کنڈیشنز کا آئیڈیا ہوجاتا ہے، پہلے جو اچھی اننگ کھیلیں انہیں سوچتا ہوں، خود اس مشکل زون سے نکلوں گا۔
ان کا کہنا ہے کہ جتنا بھی اچھا پرفارم کیا وہ ماضی تھا، میرے لئے آنے والا ہر میچ چیلنجنگ اور نیا ہے، مجھے ماضی بھولنا اور آگے دیکھنا ہے، مجھے حال پر فوکس کرنا ہے، کوشش کرتا ہوں کہ آنے والے دن کی مثبت پلاننگ کروں، اگلی ٹیم بھی پلان کرکے آتی ہے۔
بابر اعظم نے کہا کہ جب بھی کوئی میچ جیتتے ہیں تو اعتماد آتا ہے، یہی چیزیں ہیلپ کرتی ہیں ہم اپنی اچھی بری چیزوں کو ڈسکس کرتے ہیں۔
