وفاقی ادارہ شماریات کی رپورٹ کے مطابق رواں مالی سال کے پہلے 7 ماہ کے دوران ملکی برآمدات میں ایک ارب 77 کروڑ ڈالر کا اضافہ ہوا جبکہ تجارتی خسارہ بھی بڑھ گیا۔
وفاقی ادارہ شماریات کی رپورٹ کے مطابق جولائی سے جنوری تک ملکی برآمدات کا حجم 19 ارب 55 کروڑ ڈالر تک پہنچ گیا جو گزشتہ سال کی اسی مدت کے مقابلے میں دس فیصد زیادہ ہے۔
اسی عرصے میں درآمدات میں بھی 6 اعشاریہ 9 پانچ فیصد اضافہ ہوا جس کے بعد درآمدات کا حجم 33 ارب ڈالر سے تجاوز کر گیا۔
رپورٹ کے مطابق جولائی تا جنوری تجارتی خسارے میں 2 اعشاریہ 84 فیصد اضافہ ریکارڈ کیا گیا جس کے بعد تجارتی خسارے کا حجم 13 ارب 48 کروڑ ڈالر تک پہنچ گیا۔
ادارہ شماریات کے مطابق دسمبر کے مقابلے میں جنوری 2025 میں برآمدات میں 0 اعشاریہ 31 فیصد اضافہ ہوا اور برآمدات کا حجم 2 ارب 92 کروڑ ڈالر رہا اور جنوری 2024 کے مقابلے گزشتہ ماہ برآمدات میں 4 اعشاریہ 69 فیصد اضافہ ریکارڈ کیا گیا۔
دسمبر کے مقابلے میں جنوری 2025 میں تجارتی خسارے میں 5 اعشاریہ 47 فیصد کمی ہوئی جس کے بعد خسارے کا حجم دو ارب 31 کروڑ ڈالر رہ گیا، تاہم جنوری 2024 کے مقابلے گزشتہ ماہ تجارتی خسارہ 17 اعشاریہ 78 فیصد بڑھ گیا۔
جنوری میں درآمدات میں بھی 2 اعشاریہ 33 فیصد کمی ہوئی جس کے بعد درآمدات کا حجم 5 ارب 23 کروڑ ڈالر رہا۔
