پاکستان کی عالمی تنہائی کا خواب دیکھنے والوں کو 2024 میں نہ صرف ناکامی کا منہ دیکھنا پڑا بلکہ کثیر الجہتی سفارتکاری میں پاکستان کی پے درپے کامیابیوں نے مخالفین کے عزائم بھی خاک میں ملا دیئے۔
پاکستان کو عالمی تنہائی کا شکار کہنے اور سمجھنے والوں کیلئے 2024 ایک اور زوردار طمانچہ ثابت ہوا، سفارتکاری کے میدان میں پاکستان آئے روز نئی کثیر الجہتی کامیابیاں سمیٹتا رہا۔ قومی قیادت جہاں درجنوں دوست ممالک کی مہمان بنی تو وہیں اسلام آباد نے شنگھائی تعاون تنظیم سربراہی کانفرنس سمیت کئی بین الاقوامی قائدین کی میزبانی بھی کی۔
پاکستان اور جی سی سی ممالک کے درمیان اعلیٰ سطح کے رابطوں کا مضبوط تبادلہ ہوا۔ آذربائیجان، بیلاروس، چین، ایران، قازقستان، ملائیشیا، منگولیا، قطر، روس، سعودی عرب، تاجکستان، ازبکستان کی قیادت نے پاکستان کا دورہ کیا۔
چین، سعودی عرب، ایران، بھارت، جرمنی، قطر، روس اور برطانیہ کے وزارتی وفود اسلام آباد پہنچے۔ آئی ایم او اور کامن ویلتھ کے سیکرٹریز جنرل نے بھی 2024 کے دوران پاکستان کے دورے کئے۔
پاکستان 2025-2026 کی مدت کے لیے اقوام متحدہ کی سلامتی کونسل کا غیر مستقل رکن 2 سال تک کیلئے انٹرنیشنل اٹامک انرجی ایجنسی کا ممبر بورڈ آف گورنرز اور 2024 کے لیے اقوام متحدہ کے تخفیف اسلحہ کمیشن کا سربراہ منتخب ہوا۔
وزیراعظم محمد شہباز شریف نے سعودی عرب کے 4 سرکاری دورے کیے جس سے ہماری اسٹریٹجک اور اقتصادی شراکت داری مزید مستحکم ہوئی۔ اہم مفاہمتی یادداشتوں پر دستخط ہوئے۔
تجارت اور سرمایہ کاری کے مواقع بھی کویت، قطر اور متحدہ عرب امارات کے ساتھ پاکستان کی دو طرفہ مصروفیات کا ایک اہم مرکز رہے ہیں۔
پورے سال کے دوران پاکستان نے اقوام متحدہ سمیت ہر علاقائی اور بین الاقوامی فورم پر غزہ میں نسل کشی اور اسرائیلی جارحیت کے خاتمے پر زور دیا۔ مقبوضہ کشمیر میں بھارت کے انسانیت سوز مظالم کیخلاف بھی بھرپور آواز بلند کی۔
