سماء نیوز کی 17 ویں سالگرہ کے موقع پر لاہور ہیڈ آفس، اسلام آباد اور کراچی بیورو آفس ، فیصل آباد، ملتان ، پشاور ، کوئٹہ میں خصوصی تقاریب کا انعقاد کیاگیا۔ گورنر پنجاب نے لاہور، عطاء اللہ تارڑ نے اسلام آباد اور گورنر سندھ نے کراچی میں بطور مہمان خصوصی شرکت کی اور کیک کاٹا۔
لاہور ہیڈ افس
گور نر پنجاب سردار سلیم حیدر نے سماء کی 17 ویں سالگرہ کے موقع پر لاہور ہیڈ آفس میں سی او سماء جنید امین ، جی ایم ڈیجیٹل عاصم صدیق، ڈائریکٹر نیوز طارق محمود، سینئر صحافی افتخار احمد اور ندیم احسان کے ہمراہ کیک کا ٹا اور اس موقع پر مختصر گفتگو کرتے ہوئے کہا کہ سماء نے ہمیشہ مثبت صحافت کی، مستند ٹیم ،جاندار سیاسی تجزیے سماء کا طرہ امتیاز ہے، صحافت ایک بڑی ذمہ داری،سماء مصدقہ خبر عوام تک پہنچاتا ہے، دعا ہے سماء دن دگنی اور رات چوگنی ترقی کرے۔
اسلام آباد بیورو آفس
سماء کے اسلام آباد بیورو آفس میں شاندار تقریب کا انعقاد کیا گیا جہاں وفاقی وزیر اطلاعات عطاء اللہ تارڑ بطور مہمان خصوصی شریک ہوئے اور ڈائریکٹر ویژن گروپ عبدالافع خان اور صدر سماء نیوز ندیم ملک کے ساتھ مل کر کیک کاٹا۔
اسلام آباد میں منعقد کی گئی خصوصی تقریب میں عطاء اللہ تارڑ نے چینل کی ٹیم کو کامیابی پر مبارک با ددی اور کہا کہ سماء کو 17 ویں سالگرہ پر مبارکباد پیش کرتا ہوں، سماءذمہ دارانہ صحافت کےفروغ کیلئے کردار ادا کر رہا ہے، سماء ایک متوازن رپورٹنگ کرتا ہے، سماءکی کامیابی کیلئے نیک خواہشات کا اظہار کرتا ہوں۔
انہوں نے کہا کہ سماء میڈیا انڈسٹری میں دیگر چینلز کی نسبت ورکرز کا زیادہ خیال رکھتاہے، سماءکی مینجمنٹ اور پوری ٹیم کیلئے بہت ساری نیک تمنائیں ہیں، ہماری دعا ہے کہ سماءآگے بڑھے اور ترقی کرتا رہے، وزیراطلاعات کا صحافیوں سے چولی دامن کا ساتھ ہوتا ہے، صحافیوں کی ہیلتھ انشورنس کیلئے اگلے سال کا بھی پریمیئم ادا کر دیا، صحافیوں کی انشورنس پالیسی یقینی بنائی جارہی ہے۔
ان کا کہناتھا کہ ہم سیاستدان ہیں،ہماراکام ہےبرداشت کرنا، تمام صحافی تنظیموں سے ہمارا رابطہ ہے، میڈیا کے حوالے سے وقت آگے بڑھ گیا مگر ہمارے رولز آگے نہیں بڑھے، معاشرے کا تحفظ ہمارےآنے والے مستقبل کا تحفظ ہے، آج کل ایسا نظام ہے کہ باہر سے اکاونٹ ہیں اور باہر سے ہی لوگ ، میڈیا کے حوالے سے ہم چاہتے ہیں کہ سب تنظیمیں مل بیٹھیں۔
کراچی بیورو آفس
گورنر سندھ کامران ٹیسوری نے کراچی بیورو آفس میں سماء کی 17 ویں سالگرہ کے موقع پر بطور مہمان خصوصی شرکت کی اور کیک کاٹا ۔ گورنرسندھ کامران ٹیسوری نے سماء کو سالگرہ کی مبارکباد دیتے ہوئے کہا کہ سماء ٹی وی اعتماد کا نام ہے، 17سال کامیابی سے مکمل ہونے پر منیجمنٹ کو مبارکباد،سماء دیکھے بغیر میری صبح نہیں ہوتی، نیوز،کرنٹ افیئرز سمیت تمام شعبوں میں سماء کی پرفارمنس بہترین ہے، آج سے میں بھی سماء فیملی کا حصہ بن گیاہوں۔
فیصل آباد بیورو آفس
سماء نیوز کی 17 ویں سالگرہ کے موقع پر فیصل آباد بیور و میں منعقد تقریب میں وزیراعظم کے مشیر رانا ثناء اللہ نے بطور مہمان خصوصی شرکت کی اور بیورو چیف کے ہمراہ کیک کاٹا ۔
اس موقع پر مشیر وزیراعظم رانا ثناء اللہ نے سماء نیوز کو 17 سال مکمل ہونے پر مبارک باد دیتے ہوئے کہا کہ سماء ملک کے بڑے نیوز چینلز میں سے ایک ہے، سماء اور اس کی ٹیم کو سترویں سالگرہ پر مبارکباد پیش کرتے ہیں، امید ہے سماء ملک و قوم کی خدمت کا فریضہ جاری رکھے گا۔
پشاور بیورو آفس
گورنر کے پی کے فیصل کریم کنڈی نے سماء نیوز کی 17 ویں سالگرہ کے موقع پر پشاور بیورو میں منعقد تقریب میں شرکت کی اور بیورو چیف محمود جان کے ہمراہ کیک کاٹا ۔ اس موقع پر گورنر خیبر پختونخوا نے سماء کی ٹیم کو بے مثال صحافت پر مبارک باد دی ۔
