وزارت صحت نے ملک بھر میں جعلی ادویات کا خاتمہ یقینی بنانے کیلئے اقدامات اٹھا لیئے ، وفاقی کابینہ نے ادویات پر ٹریک اینڈ ٹریس سسٹم کے نفاذ کی باضابطہ منظوری دیدی ۔ ڈرگ لیبلنگ اینڈ پیکنگ رولز انیس سو اٹھہتر میں ضروری ترامیم کی گئی ہیں ۔
وزیر صحت مصطفیٰ کمال کا کہنا تھا یہ فیصلہ جعلی ادویات کے خاتمے کی جانب اہم قدم ہے ۔ آئندہ ہر دوا کو ڈیجیٹل طریقے سے ٹریک اور ویریفائی کیا جا سکے گا ۔ جعلی ، غیرمعیاری اور نقلی ادویات کی نشاندہی اور ان کا خاتمہ ممکن ہوگا ۔ صارف باآسانی دوا کی میعادِ استعمال اور قیمت کی مستند معلومات حاصل کر سکے گا ۔ ڈرگ ریگولیٹری اتھارٹی اس جدید نظام کو ملک بھر میں نافذ کرےگی ۔ نئے قواعد کے تحت تمام دوا ساز کمپنیوں اور درآمد کنندگان کے لئےلازم ہو گا کہ ہر دوا کے پیک پر معیاری ٹو ڈی بارکوڈ اور سیریلائزیشن ڈیٹا درج کریں ۔ اس سے پاکستان خطے میں جدید ٹیکنالوجی اپنانے والا نمایاں ملک بن جائے گا ۔
