لاہور ہائیکورٹ نے حکومت پنجاب کی جانب سے مارکیٹوں کا وقت 10 بجے کرنے پر ناراضگی کا اظہار کیا۔ عدالت نے ریمارکس دیے کہ لگتا ہے مارکیٹوں کا وقت تبدیل کرنے میں پریشر گروپ اور مافیاز کا ہاتھ ہے۔ عدالت نے ایل ڈی اے کو سڑکوں پر ریڑھی لگانے والوں کے حوالے سے پالیسی لانے کی بھی ہدایت کردی۔
ایڈووکیٹ جنرل نے بیان دیا کہ میں اس پر ابھی رپورٹ لے لیتا ہوں کس بنا پرمارکیٹس کا وقت تبدیل کیا گیا، عدالت نے ایل ڈی اے کو سڑکوں پر ریڑھی لگانے والوں کے حوالے سے پالیسی لانے کی ہدایت کردی۔ عدالت نے ریمارکس دیے کہ سڑکوں پر ریڑھیاں لگنے سے ٹریفک کی روانی متاثر ہوتی ہے۔ ریڑھیوں کے لیے الگ سے جگہ مختص ہونی چاہیے۔
ایل ڈے اے کے وکیل نے یقین دہانی کرائی کہ ہم اس حوالے سے کام کر رہے ہیں۔ ایڈووکیٹ جنرل پنجاب نے عدالت کو آگاہ کیا کہ ہر چھ ماہ بعد گاڑیوں کی فٹنس انسپکشن کے لیے پوائنٹس مقرر کررہے ہیں۔
عدالت نے ریمارکس دیے کہ فٹنس سرٹیفکیٹ کے بعد گاڑیوں پر ٹیگ لگایا جائے۔ موٹر سائیکل اور چھوٹے لوڈرز کو آپ نے خاص طور پر چیک کرنا ہے۔ سیف سٹی کیمروں سے گاڑی گزرے تو علم ہو جائے کہ اس کی فٹنس سرٹیفکیٹ کا ٹیگ لگا یا نہیں۔
عدالت نے کیس کی مزید سماعت آئندہ جمعے تک ملتوی کرتے ہوئے مختلف محکموں سے اسموگ کی روک تھام سے متعلق رپورٹس طلب کرلیں۔
