کراچی کے علاقے نارتھ ناظم آباد میں چوری کی بڑی واردات سامنے آئی ہے، جہاں ایک گھر میں کام کرنے والا پلمبر 60 تولہ سونا اور 6 لاکھ روپے نقدی چوری کر کے فرار ہو گیا۔ تاہم پولیس نے بروقت کارروائی کرتے ہوئے 24 گھنٹے کے اندر ہی ملزم کو گرفتار کر لیا۔
ایس ایس پی انویسٹی گیشن انعم تجمل کے مطابق ملزم نے چوری شدہ سونا اور نقد رقم اپنے ایک دوست کے گھر میں چھپا رکھی تھی، جسے ملزم کی نشاندہی پر برآمد کر لیا گیا ہے۔ پولیس حکام کا کہنا ہے کہ ملزم نے چوری کی رقم سے ایک موٹر سائیکل بھی خریدی تھی۔
پولیس کے مطابق یہ رواں سال کراچی میں چوری کی دوسری بڑی واردات ہے۔ نارتھ ناظم آباد میں پلمبری کے کام کے لیے آنے والے ملزم نے موقع پا کر گھر کی الماریوں کے تالے توڑے اور 60 تولہ سونا اور 6 لاکھ روپے نقدی چوری کر کے فرار ہو گیا۔
متاثرہ افراد نے گزشتہ روز مقدمہ درج کرایا، جس کے بعد پولیس نے تکنیکی بنیادوں پر کارروائی کرتے ہوئے چند گھنٹوں میں ہی ملزم فیصل کو گرفتار کر لیا۔ ایس ایس پی انویسٹی گیشن انعم تجمل کے مطابق متاثرہ شخص عمرے کی ادائیگی کے لیے بیرون ملک گیا ہوا تھا، واپسی پر گھر کے دروازے ٹوٹے ہوئے تھے اور قیمتی سامان غائب تھا۔
متاثرہ شہری کا کہنا ہے کہ ملزم فیصل کئی سالوں سے ان کے گھر میں پلمبری کا کام کرتا تھا، جس کا فائدہ اٹھاتے ہوئے اس نے واردات کی۔
