وزیر داخلہ محسن نقوی کا کہنا ہے کہ خیبرپختونخوا میں امن و امان کا قیام حکومت کی اولین ترجیح ہے، امن کوششوں کو سبوتاژ کرنے میں بیرونی ہاتھ نظر انداز نہیں کیا جاسکتا۔
گورنر خیبرپختونخوا فیصل کریم کنڈی نے وزارت داخلہ میں وفاقی وزیر داخلہ محسن نقوی سے ملاقات کی۔ صوبے کی صورتحال، امن و امان اور کرم کے واقعات پر تبادلہ خیال کیا۔ مستقبل میں ایسے واقعات روکنے کے لیے کثیر الجہتی مشترکہ حکمت عملی بنانے پر اتفاق کیا گیا۔ وزیر داخلہ اور گورنر خیبرپختونخوا نے کرم کے واقعات پر سخت تشویش کا اظہار کیا۔
وزیرداخلہ محسن نقوی نے خیبرپختونخوا میں امن کے لیے ہرممکن تعاون کی یقین دہانی کرائی۔ اُن کا کہنا تھا کہ خیبرپختونخوا میں امن و امان کا قیام حکومت کی اولین ترجیح ہے۔ کرم میں اراضی کے تنازع پر قیمتی جانوں کا ضیاع انتہائی افسوسناک ہے۔ انہوں نے کہا کہ بعض عناصر نے دو گروپوں کے تصادم کو غلط رنگ دیا جس سے کشیدگی بڑھی۔ سیکیورٹی فورسز نے بھی صورتحال کے تناظر میں مؤثر اقدامات کیے۔ امن کوششوں کو سبوتاژ کرنے میں بیرونی ہاتھ نظر انداز نہیں کیا جاسکتا۔
