برطانیہ کی کمپنی ”ڈیلیوری ایسوسی ایٹس“ کی جانب سے پاکستان کی معاشی ترقی میں معاونت کی پیشکش کی ہے۔
تفصیلات کے مطابق ڈیلیوری ایسوسی ایٹس کے بانی اور چیئرمین سر مائیکل باربر نے اسلام آباد میں وزیر خزانہ محمد اورنگزیب سے ملاقات میں باہمی پائیدار اقتصادی ترقی پر توجہ مرکوز کرتے ہوئے ایس آئی ایف سی کے تحت پاکستان کے ساتھ تعاون بڑھانے کا عہد کیا۔
سر مائیکل باربر نے وفاقی بجٹ 2024-25 اور حکومت کی طرف سے نافذ کردہ ٹیکسیشن اصلاحات کو سراہا، سر مائیکل باربر نے پاکستان کو درپیش چیلنجز کو تسلیم کرتے ہوئے ایس آئی ایف سی کی اقتصادی ترقی کے لیے ترجیحی شعبوں اور منصوبوں پر تبادلہ خیال کیا۔
کمپنی نے پاکستان کی حمایت جاری رکھنے اور اس کے ساتھ ساتھ مشترکہ کوششوں کو آگے بڑھانے کے عزم کا بھی اعادہ کیا۔
ملاقات کے دوران وزیر خزانہ نے ایس آئی ایف سی کے اہم ترجیحی شعبوں کا خاکہ پیش کیا جن میں ٹیکس اصلاحات، توانائی کے شعبے میں اصلاحات، اور ریاستی ملکیتی اداروں کی تنظیم نو شامل ہے۔
آئی ایم ایف پروگرام کے فریم ورک کے اندر ساختی اصلاحات پر زور دیتے ہوئے وفاقی وزیر نے برآمدات میں اضافہ، براہ راست غیر ملکی سرمایہ کاری کو راغب کرنے اور نجکاری کی کوششوں پر روشنی ڈالی۔
وزیر خزانہ نے شفافیت کو یقینی بنانے اور ٹیکس کی بنیاد کو وسعت دینے کے لیے برآمدات میں اضافے اور فیڈرل بورڈ آف ریونیو کی ڈیجیٹلائزیشن پر ایس آئی ایف سی کی کوششوں کو اجاگر کیا۔
ملاقات کے دوران پاکستان کی معاشی ترقی کے لیے ملک میں اصلاحات لانے میں ایس آئی ایف سی کی کوششوں کو سراہا گیا، پاکستان کے بہتر مستقبل کے لیے بھرپور اعتماد کا بھی اظہار کیا گیا۔
