اسلام آباد ہائیکورٹ نے پاکستان تحریک انصاف( پی ٹی آئی) کا مرکزی دفتر فوری ڈی سیل کرنے کا حکم دے دیا ۔
اسلام آباد ہائیکورٹ نے پاکستان تحریک انصاف(پی ٹی آئی) کا مرکزی دفتر سیل کرنے کے خلاف پی ٹی آئی کی درخواست منظور کرلی،جسٹس ثمن رفعت امتیاز نے محفوظ فیصلہ جاری کردیا، عدالت نے پی ٹی آئی کا مرکزی دفتر فوری ڈی سیل کرنے کا حکم دےد یا۔
فیصلے کے مطابق کیپٹل ڈویلپمنٹ اتھارٹی(سی ڈی اے) نے2022 اور2023 میں سابق مالک کو نوٹس اور پھر شوکاز نوٹس جاری کیا، سی ڈی اے کوئی وضاحت پیش نہ کر سکا کہ نوٹسز پرانے مالک کو کیوں بھیجے جاتے رہےسب سے اہم یہ ہے کہ نوٹس یا شوکاز وصولی کی کوئی رسید ریکارڈ پر نہیں ہے۔
اسلام آباد ہائیکورٹ نے اپنے فیصلے میں لکھا کہ سی ڈی اے کا بنایا گیا ایک رجسٹر نوٹسز پہنچنے کا کافی ثبوت نہیں ہے، سی ڈی اے نے پی ٹی آئی مرکزی سیکرٹریٹ سیل کرنے کے آرڈر سے پہلے کوئی نوٹس نہیں کیا عدالت تحریک انصاف کا سیکرٹریٹ فوری ڈی سیل کرنے کا حکم دیتی ہے،سی ڈی اے نے23 مئی کو غیرقانونی تعمیرات کی بنیاد پر پی ٹی آئی کا مرکزی دفتر سیل کیا تھا۔
دوسری جانب ترجمان تحریک انصاف رؤف حسن نے عدالتی فیصلے کا خیرمقدم کرتے ہوئے کہا کہ یہ فیصلہ انصاف کی جیت ہے تحریک انصاف قانون کی حکمرانی کیلئےمیدان میں کھڑی ہے۔
