وزیراعظم شہبازشریف کا کہنا ہے کہ ملکی دفاع پر بیرونی دباؤ قبول کریں گے نہ کوئی سمجھوتہ کیا جائے گا۔
وزیراعظم شہبازشریف نے اپنے پیغام میں کہا کہ یوم تکبیر ملکی دفاع ناقابل تسخیر بنانے کیلئے اتحاد کی یاد دلاتا ہے۔ ذوالفقارعلی بھٹو کے ایٹمی پروگرام شروع کرنے اور اسے جاری رکھنے میں اہم کردار ادا کرنے والے سائنسدانوں کو خراجِ عقیدت پیش کرتے ہیں۔
شہبازشریف نے کہا کہ 28 مئی کو جس طرح ملک کے دفاع کو ناقابلِ تسخیر بنایا ۔ ویسے ہی اقتصادی سلامتی کو یقینی بنائیں گے، آئیں آج عہد کریں کہ نہ صرف بیرونی دشمنوں ۔ بلکہ پاکستان میں موجود نو مئی جیسے واقعات سے انتشار کے خواہشمند عناصر کی شرپسندی کو بھی ناکام بنائیں گے۔
یاد رہے کہ پاکستان کو دنیا کی ساتویں اور عالم اسلام کی واحد ایٹمی قوت بنے 26 برس بیت گئے، بھارت کے ایٹمی دھماکوں کے جواب میں 28 مئی 1998 کو پاکستان نے یکے بعد دیگرے پانچ ایٹمی دھماکے کرکے جوہری قوت ہونے کا اعلان کیا ، آج اُسی عظیم کامیابی کی یاد میں یوم تکبیر منایا جارہا ہے۔
28 مئی 1998 کے دن چاغی کے مقام پر زمین اچانک ارتعاش میں آگئی، ریکٹر اسکیل پر 5.0 شدت کا زلزلہ آیا لیکن اس کی ھیبت نے پڑوسی ملک کے غرور کا پہاڑ گرا دیا۔
چاغی کے پہاڑوں سے ریت دھواں بن کر اڑنے لگی اور سرمئی پہاڑ سنہری رنگ کے ہوگئے اور اس کی وجہ پاکستان کے یکے بعد دیگرے 5 ایٹمی دھماکے تھے۔
پاکستان نے 28 مئی کو 5 جبکہ 30 مئی کو چھٹا ایٹمی دھماکہ کرکے دنیا کی ساتویں اور عالم اسلام کی پہلی جوہری قوت کا اعلان کیا تو دھمکی آمیز لہجوں کی عادی بھارتی حکمرانوں کی زبان نے بھی اعتدال کا ذائقہ چکھ لیا۔
پاکستان کو ایٹمی دھماکوں سے روکنے کے لیے امریکی دباؤ کام آیا نہ ملکی دفاع کا عزم عالمی پابندیوں کے خوف کے جال میں جکڑا جاسکا۔ پاکستان نے اپنے ناقابل تسخیر دفاع کا ثبوت دے کر جنوبی ایشیا میں طاقت کا توازن بھی برابر کردیا۔
