وفاقی وزیر دفاع خواجہ آصف نے کہا ہے کہ فیڈرل بورڈ آف ریونیو ( ایف بی آر ) کے محصولات عدلیہ کی توجہ کے مستحق ہیں۔
سماجی رابطے کے پلیٹ فارم ایکس پر جاری اپنے بیان میں وزیر دفاع خواجہ آصف نے کہا کہ سپریم کورٹ پر 102 ، ہائیکورٹ پر 742 اور ٹریبونلز پر 1700 ارب روپے کی رقم عدالتی کارروائی کی منتظر ہے۔
وزیر دفاع کا کہنا تھا کہ میں نے کئی سال پہلے پبلک اکاؤنٹس کمیٹی ( پی اے سی ) میں یہ مسئلہ اُٹھایا تھا۔
خواجہ آصف نے کہا کہ کوشش کر رہا ہوں کہ پتہ چلے یہ سلسلہ کب سے ہے، یہ سب ایف بی آر ، ٹیکس نادہندہ اور عدلیہ کی ملی بھگت سے ہوتا ہے، یہ 2544 ارب ہمارے بہت سے دکھ دور کر سکتے ہیں۔
انہوں نے کہا کہ ان پیسوں سے صحت ، تعلیم اور دفاع کے اخراجات پورے ہو سکتے ہیں، قرض اور آئی ایم ایف سے نجات مل سکتی ہے، یہ محصولات مذاکرات کے ذریعے سیٹل کئے جا سکتے ہیں۔
ان کا مزید کہنا تھا کہ اس معاملے میں تھوڑی ایمانداری اور وطن سے محبت کی ضرورت ہوگی۔
