چیئرمین پیپلزپارٹی بلاول بھٹو کا کہنا ہے کہ الیکشن میں مقابلہ صرف دو جماعتوں کے درمیان ہے،عوام آزاد امیدوار پر ووٹ ضائع نہ کریں۔
کراچی میں انتخابی ریلی سے خطاب میں بلاول بھٹو زرداری نے کہا کہ الیکشن میں مقابلہ 2جماعتوں کے درمیان ہے، ایک شیر والی اور دوسری جماعت تیر والی ہے، ہرکسی کو سمجھاناہے آزاد امیدوار پر ووٹ ضائع نہ کریں۔ نفرت اور تقسیم کی سیاست کرنے والے پر ووٹ ضائع نہ کریں۔
بلاول بھٹو نے مزید کہا کہ کچھ لوگ نفرت کی سیاست کرکےحکومت میں شامل ہوتےہیں، وہ لوگ وزارتیں لے کر کراچی کو بھول جاتے ہیں، مجھے موقع دیں میں کراچی کو مایوس نہیں کروں گا، باقی جماعتیں اپنے مقاصد کیلئے الیکشن لڑرہی ہیں، ہم ساتھ مل کرکراچی کی خدمت کریں گے۔
انہوں نے کہا کہ پرامیدہیں کہ صوبائی اوروفاقی حکومت بھی ہماری ہوگی، صوبےمیں حکومت ملی توکراچی کی نمائندگی ہوگی، کراچی کی20سیٹیں مل جائیں توشہرکانقشہ بدل دوں گا، 8 فروری کو ایسے نکلیں کہ پورے کراچی میں تیروں کی بارش ہو، مسائل کا حل نکالنا ہے تو ایک بارپیپلزپارٹی کاساتھ دیں۔ میرے امیدوار منتخب ہوئے تو مسائل مجھ تک پہنچائیں گے۔
چیئرمین پیپلزپارٹی کا کہنا تھا کہ کراچی تو میرا اپنا شہر ہے، شہید بینظیر بھٹو بھی کراچی میں پیداہوئی تھیں، میں کراچی کی خدمت کرنا چاہتا ہوں، کراچی کی ترقی میں اپنا کردار ادا کرنا چاہتا ہوں، کراچی نے بلدیاتی الیکشن میں پیپلزپارٹی پراعتماد کیا، امید ہے صوبائی اور وفاقی حکومت بھی ہماری ہوگی۔
بلاول بھٹو کا کہنا تھا کہ کراچی کو تقسیم کرنے کی کسی کواجازت نہیں دیں گے، قائدعوام نے کہا تھانہ تیرانہ میرا سب کا پاکستان ہے، تیر پر مہر لگاکر تمام قوتوں کوجواب دیں یہ سب کاکراچی ہے، کوئی مذہب کی بنیاد، کوئی لسانیت کی بنیاد پر تقسیم چاہتا ہے، ہم کراچی کے مینڈیٹ کا تحفظ کریں گے۔
