لاہور میں تیز ہوائیں چلنے اور بارش سے موسم خوشگوار ہو گیا، تاہم شہر کے مختلف علاقوں میں بجلی کی فراہمی متاثر ہو گئی۔
ذرائع کے مطابق تیز آندھی کے باعث متعدد فیڈرز ٹرپ کر گئے، جس کے نتیجے میں کئی علاقے اندھیرے میں ڈوب گئے۔
بجلی سے محروم ہونے والے علاقوں میں ڈیوس روڈ، گڑھی شاہو، اسٹیٹ لائف، باغبانپورہ، جوہر ٹاؤن اور دیگر متعدد علاقے شامل ہیں، جہاں بجلی کی فراہمی معطل ہونے سے شہریوں کو مشکلات کا سامنا کرنا پڑا۔
ذرائع کا کہنا ہے کہ گزشتہ روز بھی تیز آندھی کے باعث شہر کے مختلف مقامات پر 11 کے وی کی بجلی کی تاروں کو نقصان پہنچا تھا، جس کے اثرات تاحال بعض علاقوں میں محسوس کیے جا رہے ہیں۔
متعلقہ اداروں کی جانب سے متاثرہ فیڈرز کی بحالی اور بجلی کی فراہمی جلد بحال کرنے کے لیے کام جاری ہے۔
دوسری جانب میانوالی میں بھی طوفان کے بعد گرج چمک کے ساتھ موسلا دھاربارش ہوئی جس سے موسم خوشگوار ہو گیا تاہم طوفان کے باعث مختلف فیڈرز ٹرپ ہو گئے اور بجلی کی فراہمی معطل ہے ۔
آندھی کے باعث بازاروں میں لگے سائن بورڈ گر گئے، گرد آلود ہواؤں اور سیاہ بادلوں سے حدِ نگاہ متاثر ہوئی ۔
