سعودی وزارتِ حج و عمرہ نے عازمینِ حج کو ہدایت کی ہے کہ وہ وقوفِ عرفہ کے دوران اپنے خیموں میں موجود رہیں اور غیر ضروری طور پر باہر نکلنے سے گریز کریں۔
وزارتِ حج و عمرہ کے مطابق میدانِ عرفات میں آج موسم انتہائی گرم رہنے کا امکان ہے، اس لیے عازمین سورج کی تیز دھوپ اور شدید گرمی سے بچنے کیلئے احتیاطی تدابیر اختیار کریں۔
سعودی حکام نے عازمین کو ہدایت کی ہے کہ وہ صبح دس بجے سے شام چار بجے تک خیموں میں ہی قیام کریں، جہاں خطبۂ حج آڈیو اور ویڈیو لنک کے ذریعے سنا جا سکے گا۔
وزارتِ حج و عمرہ نے عازمین کو جبلِ رحمت پر چڑھنے سے بھی اجتناب کرنے کی تاکید کی ہے تاکہ گرمی کی شدت اور دھوپ کے باعث کسی بھی ناخوشگوار صورتحال سے بچا جا سکے۔
