بنگلادیش نے دوسرے ٹیسٹ میں بھی پاکستان کو ہرا دیا، میزبان ٹیم نے 2 میچز کی ٹیسٹ سیریز 2-0 سے جیت لی۔
سلہٹ میں کھیلے گئے دوسرے میچ میں 437 رنز کے ہدف کے تعاقب میں پاکستان کی ٹیم 358 رنز بنا سکی اور یوں دوسرے ٹیسٹ میں مہمان ٹیم کو 78 رنز سے شکست کا سامنا کرنا پڑا۔
پاکستان کی جانب سے محمد رضوان 94، کپتان شان مسعود اورسلمان علی آغا 71، 71 رنز بنا کر نمایاں رہے جبکہ بابر اعظم نے 47 اور ساجد خان نے 28 رنز کی اننگز کھیلی۔
بنگلادیش کی طرف سے تیج الاسلام نے 6، ناہید رانا نے 2 جبکہ شرف الاسلام اور مہدی حسن میراز نے 1، 1 وکٹ حاصل کی۔
چوتھے روز کھیل
چوتھے روز کھیل کے اختتام پر پاکستان نے اپنی دوسری اننگز میں 7 وکٹوں کے نقصان پر 316 رنز بنالیے ہیں اور ٹیم کو فتح کیلئے مزید 121 رنز درکار تھے۔
پاکستان کی جانب سے محمد رضوان 75 اور ساجد خان 8 رنز کے ساتھ کریز پر موجود ہیں۔
اس سے قبل کپتان شان مسعود اور سلمان علی آغا نے 71، 71 رنز کی ذمہ دارانہ اننگز کھیلیں جبکہ بابراعظم 47 رنز بناکر آؤٹ ہوئے۔
اذان اویس 21، عبداللہ فضل اور سعود شکیل 6، 6 رنز بناسکے جبکہ حسن علی کھاتہ کھولے بغیر پویلین لوٹ گئے۔
بنگلادیش کی جانب سے تیج السلام نے 4، ناہید رانا نے 2 اور مہدی حسن نے ایک وکٹ حاصل کی۔
اس سے قبل بنگلادیش نے اپنی دوسری اننگز میں 390 رنز بناکر پاکستان کو جیت کیلئے 437 رنز کا ہدف دیا تھا۔
یاد رہے کہ پاکستان نے ٹاس جیت کر پہلے فیلڈنگ کا فیصلہ کیا تھا۔ بنگلادیش نے پہلی اننگز میں 278 رنز بنائے جبکہ پاکستان کی ٹیم پہلی اننگز میں 232 رنز پر آؤٹ ہوگئی تھی۔
