لاہور میں نویں جماعت کے بیالوجی کے امتحان کے دوران جعلی امیدوار اور نقل کرنے والے طلبا پکڑے گئے۔
ذرائع کے مطابق ڈگری کالج جنڈیالہ شیر میں ایک جعلی امیدوار کو گرفتار کرلیا گیا، جو اپنے بھائی کی جگہ امتحان دے رہا تھا۔ گرفتار نوجوان نے مؤقف اختیار کیا کہ اس کے بھائی کی طبیعت خراب تھی، اس لیے وہ اس کی جگہ امتحان دینے آیا۔ پولیس نے جعلی امیدوار کے خلاف مقدمہ درج کرلیا ہے۔
ادھر گورنمنٹ اسکول موڑا کھنڈا میں ایک طالبعلم کو نقل کرتے ہوئے پکڑا گیا۔ طالبعلم بیالوجی کی کتاب کے صفحات چھپا کر امتحان ہال میں نقل کر رہا تھا۔ متعلقہ امیدوار کے خلاف یو ایم سی بنا دی گئی۔
کنٹرولر امتحانات لاہور بورڈ کے اسکواڈ نے مختلف امتحانی مراکز کا دورہ کیا، جس دوران خلاف ورزیوں میں ملوث امیدواروں کو پکڑا گیا۔
کنٹرولر امتحانات لاہور بورڈ کا کہنا ہے کہ امتحانات میں شفافیت ہر صورت برقرار رکھی جائے گی اور نقل یا جعلسازی میں ملوث افراد کے خلاف سخت کارروائی کی جائے گی۔
