ایران کے صوبے سیستان بلوچستان میں نامعلوم افراد کی جانب سے پولیس پر حملے میں 3 اہلکار جاں بحق ہوگئے۔
ایرانی سرکاری ٹی وی کے مطابق حملے میں دو اہلکار موقع پر جاں بحق ہوئے جبکہ زخمی اہلکاروں میں سے ایک دورانِ علاج دم توڑ گیا۔ فائرنگ کے واقعے میں 3 پولیس اہلکار زخمی بھی ہوئے۔
صوبائی پولیس کمانڈ سیستان بلوچستان نے واقعے کے بعد ایک بیان میں کہا کہ حملہ آوروں کی گرفتاری کے لیے کارروائی جاری ہے۔
خیال رہے کہ مارچ میں بھی صوبہ سیستان و بلوچستان میں نامعلوم افراد کے حملے میں پولیس کے پانچ اہلکاروں سمیت 6 افراد جاں بحق ہو گئے ہیں۔ ایران کی سرکاری خبر رساں ایجنسی کی رپورٹ کے مطابق پولیس کی گاڑی پر اس وقت فائرنگ کی گئی جب اہلکار گشت پر تھے۔
