سنگاپور میں ایک فرانسیسی طالبعلم پر الزام عائد کیا گیا ہے کہ اس نے ایک شاپنگ مال میں موجود اورنج جوس وینڈنگ مشین کی اسٹرا کو چاٹ کر دوبارہ ڈسپنسر میں رکھ دیا اور اس واقعے کی ویڈیو انسٹاگرام پر پوسٹ کر دی۔
کمپنی ترجمان کے مطابق واقعے کے بعد مشین میں موجود تمام 500 اسٹرا تبدیل کر دیے گئے اور پولیس میں رپورٹ درج کرائی گئی۔ کمپنی نے صفائی اور حفاظتی اقدامات بھی سخت کر دیے ہیں۔
پولیس نے نوجوان پر عوامی پریشانی کے الزامات عائد کیے ہیں۔ اگر وہ مجرم ثابت ہوا تو اسے 2 سال سے زائد قید اور بھاری جرمانے کا سامنا کرنا پڑ سکتا ہے۔
یہ واقعہ 12 مارچ کو پیش آیا تھا۔ نوجوان نے اپنی ویڈیو کے ساتھ یہ جملہ بھی لکھا تھا کہ شہر محفوظ نہیں ہے۔ اس کے تعلیمی ادارے نے بھی معاملے کا نوٹس لیتے ہوئے اندرونی تحقیقات شروع کر دی ہیں۔
