اقتصادی رابطہ کمیٹی کے اجلاس میں بچوں کی ویکسینیشن، تعلیم اور سیکیورٹی کیلئے اربوں روپے کی منظوری دے دی گئی، وزیراعظم یوتھ اسکل پروگرام کے لیے بھی رقم منظور کرلی گئی۔
وزیر خزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا ، اجلاس میں مختلف تکنیکی گرانٹس کی منظوری دی گئی۔بچوں کی ویکسینیشن پروگرام کیلئے 2ارب 80 کروڑ روپے کی منظوری دی گئی۔ فنڈز 80 لاکھ بچوں کو بیماریوں سے بچاؤ کیلئے خرچ کئے جائیں گے۔ وزارت خزانہ کے مطابق ویکسین، سرنجز اور کولڈ چین نظام کو مزید بہتر بنایا جائے گا۔
اقتصادی رابطہ کمیٹی نے چھالیہ اور سپاری کی درآمد کے قواعد میں تبدیلی کی بھی منظوری دی۔ایئرپورٹس سیکیورٹی فورس کیلئے 30کروڑ 60 لاکھ روپے کی منظوری دی گئی جبکہ ملازمین کیلئے الاؤنسز اور ادائیگیوں کیلئے فنڈز کے اجرا کی بھی منظوری دی گئی۔
تعلیم کے شعبے کیلئے 2 ارب روپے کی گرانٹ منظور کی گئی۔اسلام آباد میں دانش اسکول کے قیام کیلئے فنڈز مختص کئے گئے۔وزیراعظم یوتھ اسکل پروگرام کیلئے بھی رقم کی منظوری دی گئی۔اجلاس میں نوجوانوں کیلئے ہنر سیکھنے کے مواقع بڑھانے پر زور دیا گیا۔
