وزیراعلیٰ مریم نواز کی ہدایت پر صوبے میں مفت سفری سہولیات کی فراہمی کا باقاعدہ آغاز کر دیا گیا ہے۔
پنجاب ماس ٹرانزٹ اتھارٹی کے مطابق اس اقدام کے لیے تمام ضروری انتظامات مکمل کر لیے گئے ہیں، جس کے تحت شہریوں کو میٹرو بس سروسز، اورنج لائن میٹرو ٹرین، سپیڈو بس اور الیکٹرک بسوں میں مفت سفر کی سہولت فراہم کی جائے گی۔
وزیر ٹرانسپورٹ کے مطابق اورنج لائن میٹرو ٹرین کے ذریعے روزانہ 3 لاکھ سے زائد مسافروں کو مفت سفری سہولت میسر آئے گی، جبکہ میٹرو بس سروس سے تقریباً 1 لاکھ 40 ہزار سے زائد افراد مستفید ہوں گے۔
اسی طرح سپیڈو بس سروس کے ذریعے پونے 2 لاکھ سے زائد شہریوں کو مفت سفر کی سہولت فراہم کی جائے گی، جبکہ گرین الیکٹرک بسوں سے روزانہ تقریباً 17 ہزار 500 مسافر مستفید ہو سکیں گے۔
بلال اکبر کا کہناتھا کہ راولپنڈی میں گرین الیکٹرک بسوں سے تقریبا 35 ہزار جبکہ پا کستان میٹرو بس سروس سے ڈیڑھ لاکھ سے زائد مسافر مستفید ہوں گے، ملتان میٹرو بس سسٹم سے 51 ہزار سے زائد جبکہ فیڈر روٹس سے تقریبا 19 ہزار مسافر مفت سفر کر سکیں گے۔
انہوں نے کہا کہ پی ایم اے کے تحت روزانہ کم و بیش 9 لاکھ مسافر فری سفر کی سہولت سے مستفید ہوں گے۔ وزیر ٹرانسپورٹ اینڈ ماس ٹرانزٹ بلال اکبر خان نے فری سفری سہولت کےلیے جاری اقدامات پر اطمینان کا اظہار کیا۔
ان کا کہناتھا کہ وزیر اعلی پنجاب مشکل کی اس گھڑی میں عوام کیساتھ کھڑی ہیں، فری سفری سہولت سے غریب و متوسط طبقے کو بڑا ریلیف ملے گا، 18 مختلف اضلاع میں چلنے والی الیکٹرک بسوں سے بھی مزید لاکھوں مسافر روزانہ مفت سفر کریں گے، پیٹرولیم مصنوعات کی قیمتوں میں کمی ہوتے ہی نجی ٹرانسپورٹ کے کرایوں میں فوری کمی کروائیں گے۔
