گھوٹکی رونتی کچے میں پولیس اور رینجرز کا مشترکہ آپریشن جاری ہے، کچے میں دہشت کی علامت ڈاکو ثناءاللہ عرف ثنو شر اپنے ساتھی سمیت ہتھیار ڈال کر سرنڈر ہوگیا۔ روجھان میں اندھیڑ گینگ کے کارندوں سمیت 12 اشتہاری ڈاکووں نے سرنڈرکردیا۔ سرنڈر کرنیوالے ڈاکووں کی تعداد 400 سے زیادہ ہوگئی۔
رونتی کچے میں جاری آپریشن کے دوران علاقے میں خوف کی علامت سمجھے جانے والے خطرناک ڈاکو ثناء اللہ عرف ثنو شر نے اپنے ساتھی عاشق شہر سمیت پولیس کے سامنے ہتھیار ڈال دیئے۔ پولیس کے مطابق ثناء اللہ عرف ثنو شر کے خلاف ایک سو سے زائد سنگین مقدمات درج تھے۔ وہ پولیس اہلکاروں کی شہادت، اغواء برائے تاوان اور دیگر سنگین جرائم میں مطلوب تھا۔ ڈاکو ثنو شر کے سر کی قیمت ایک کروڑ روپے مقرر تھی،ملزم نے پولیس کے دباؤ اور خوف کے باعث سرنڈر کیا۔
ایس ایس پی گھوٹکی مطابق کچے میں اب صرف راہب شر گینگ باقی ہے وہ بھی جلد ہتھیار ڈال دے گا ۔ایس ایس پی گھوٹکی کے مطابق کہ ہتھیار نہ ڈالنے والے ڈاکوؤں کے خلاف سخت کارروائی کی جائے گی۔اب تک کچے کا نوے فیصد علاقہ اب سیکیورٹی فورسز کے کنٹرول میں ہے اور جلد پورے علاقے کو جرائم پیشہ عناصر سے پاک کر کے امن و امان بحال کر دیا جائے گا۔
دوسری جانب روجھان میں بھی تنویر اندھیڑ گینگ ، بیکھرانی گینگ اور بنوں گینگ کے کارندوں سمیت بارہ مزید اشتہاری ڈاکووں نے سرنڈر کردیا ہے۔ سرنڈر ہونیوالے کچہ کریمنل اغواء برائے تاوان ، قتل، ڈکیتی، پولیس کی شہادتوں سمیت معتدد وارداتوں میں رحیم یار خان راجن پور سمیت دیگر شہروں میں مطلوب ہیں ۔پولیس کے سامنے سرنڈر ہونیوالے اشتہاری ڈاکووں کی تعداد چار سو سے زیادہ ہوگئی ہے۔ ایس ڈی پی او عبدالکریم کا کہنا ہے اشتہاری ڈاکووں کیساتھ پولیس آپریشن جاری ہے۔ قانون کی رٹ چیلنج کرنیوالے اشتہاری ڈاکووں نے سرنڈرنہ کیا توانہیں منطقی انجام تک پہنچانےتک آپریشن جاری رہےگا۔
