عالمی بینک کا پاکستان کیلئے 20 ارب ڈالر کے 10 سال کے پروگرام پر عمل درآمد کا اعادہ کرلیا۔
سعودی عرب کے شہر العُلا میں عالمی کانفرنس کے موقع پر وفاقی وزیر خزانہ محمد اورنگزیب نے عالمی بینک کی منیجنگ ڈائریکٹر سے ملاقات کی، العُلا میں منعقدہ کانفرنس میں مختلف عالمی مالیاتی اداروں کے حکام شرکت کررہے ہیں۔
ترجمان وزارت خزانہ کے مطابق ملاقات میں توانائی، تعلیم، صحت اور موسمیاتی تبدیلی میں تعاون پر گفتگو کی گئی، ملاقات میں پاکستان اور عالمی بینک کے ترقیاتی فریم ورک پر پیش رفت کا جائزہ لیا گیا۔ وزیر خزانہ محمد اورنگ زیب نے وفاقی اور صوبائی حکومتوں کے باہمی تعاون سے آگاہ کیا۔
ترجمان کے مطابق عالمی بینک نے پاکستان کی اصلاحات کی حمایت جاری رکھنے کی یقین دہانی کرائی جبکہ پاکستان کیلئے 20 ارب ڈالر کے 10 سال کے پروگرام پر عمل درآمد کا اعادہ کیا۔
اعلامیے کے مطابق وفاقی وزیر خزانہ نے قرض کے بدلے ترقیاتی منصوبوں پر بھی بات چیت کی، عالمی بینک نے پاکستان کے مختلف منصوبوں پر عملدرآمد بہتر بنانے پر زور دیا۔
گفتگو کے دوران توانائی، تعلیم، صحت، ماحولیاتی تبدیلی سے نمٹنے، قرضہ برائے ترقی مالیاتی اصلاحات اور انفراسٹرکچر ڈیولپمنٹ جیسے اہم شعبوں پر تفصیلی بات چیت ہوئی۔ دونوں فریقین نے اس بات پر زور دیا کہ ترقیاتی منصوبوں کے لیے واضح اہداف، کارکردگی جانچنے کے مؤثر پیمانے اور مضبوط عملدرآمدی نظام ناگزیر ہیں تاکہ وعدوں کو عملی نتائج میں بدلا جا سکے۔
سینیٹر محمد اورنگزیب نے ورلڈ بینک گروپ کے ساتھ قریبی تعاون کے عزم کو دہراتے ہوئے کہا کہ وفاقی وزارتیں مکمل تعاون فراہم کریں گی، جبکہ صوبائی حکومتوں کے کردار کو بھی ناگزیر قرار دیا تاکہ بہتر ہم آہنگی، بروقت عملدرآمد اور قابلِ پیمائش نتائج یقینی بنائے جا سکیں۔
واضح رہے کہ کانفرنس برائے ابھرتی ہوئی معیشتوں کا آغاز 2025 میں کیا گیا تھا، جس میں دنیا بھر سے وزرائے خزانہ، مرکزی بینکوں کے گورنرز، اعلیٰ پالیسی ساز، بین الاقوامی مالیاتی اداروں کے سربراہان اور ماہرین شریک ہو کر عالمی اقتصادی چیلنجز اور مواقع پر غور کرتے ہیں۔
