پاکستان اور ملائیشیا نے بحری تعاون مزید مضبوط بنانے پر اتفاق کرلیا۔ دوطرفہ بحری شراکت داری اور مستقبل کے تعاون کے عزم کی توثیق بھی کردی گئی ہے۔
آئی ایس پی آر کے مطابق چیف آف دی نیول اسٹاف ایڈمرل نوید اشرف نے ملائیشیا کے سرکاری دورے میں رائل ملائیشین نیوی کی قیادت سے ملاقات کی، رائل ملائیشین نیوی ہیڈکوارٹرز آمد پر ایڈمرل نوید اشرف کو گارڈ آف آنر پیش کیا گیا۔
بحری قائدین کی ملاقاتوں میں سمندری سلامتی چیلنجز سے نمٹنے کیلئے مشترکہ حکمت عملی پر تبادلہ خیال کیا گیا۔
ایڈمرل نوید اشرف نے علاقائی سلامتی میں پاکستان نیوی کے کردار کو اجاگر کیا۔ سربراہ پاک بحریہ نے ملائیشیا کے نیشنل ہائیڈروگرافک سینٹر کا بھی دورہ کیا۔ ایڈمرل نوید اشرف نے پاکستان اور ملائیشیا کے درمیان ہائیڈروگرافک تعاون بڑھانے پر زور دیا۔
