وزیردفاع خواجہ آصف کا کہنا ہے کہ بلوچستان کی سنجیدہ شکایات اور تحفظات کو سنا جانا چاہئے۔
وزیردفاع خواجہ آصف نے بلوچستان میں سیاسی کمیٹی بنا کر وہیں اجلاس بلانے کا مشورہ دے دیا۔ پارلیمنٹ ہاؤس کے باہر میڈیا سے گفتگو میں وزیر دفاع خواجہ آصف نے کہا کہ سیاسی کمیٹی بنا کر دہشتگرد عناصر کو تنہا کیا جا سکتا ہے۔ ہمیں اس معاملے میں زیادہ چوکنا ہونے کی ضرورت ہے۔
خواجہ آصف نے کہا کہ بلوچستان میں بڑے کم نقصان کے ساتھ کامیابی ہوئی، وفاق اور صوبے کی جانب سے سیاسی اقدامات اٹھانے کی ضرورت ہے۔
یاد رہے کہ دہشت گردوں نے دو روز پہلے کوئٹہ، مستونگ، نوشکی، دالبندین، خاران، پنجگور، گوادر اور پسنی میں حملے کئے تھے۔ جن میں خواتین ، بچوں اور مزدوروں سمیت 18 شہری جاں بحق ہوئے۔ شدید جھڑپوں میں قوم کے 15 جانباز بیٹے اپنی جان بھی دفاع وطن پر نچھاور کرچکے ہیں۔
سیکیورٹی فورسز نے معصوم شہریوں کو نشانہ بنانے والوں کو نشان عبرت بنانے کی مہم تیز تر کردی ہے۔ سیکیورٹی ذرائع کے مطابق بلوچستان میں فتنہ الہندوستان کے دہشتگردوں کے خلاف آپریشن جاری ہے، گزشتہ رات آپریشن کے دوران مزید 22 دہشتگرد ہلاک ہوگئے۔ تین روز کے دوران ہلاک دہشتگردوں کی تعداد 177 ہوگئی۔
