وفاقی وزیر داخلہ محسن نقوی نے نیشنل پولیس اکیڈمی اسلام آباد میں زیرِ تربیت اسسٹنٹ سپرنٹنڈنٹس آف پولیس (اے ایس پیز) کو پاسنگ آؤٹ کے موقع پر پلاٹ دینے کا اعلان کرتے ہوئے پولیس افسران کے مالی اور پروموشن سے متعلق مسائل جلد حل کرنے کی یقین دہانی کرائی ہے۔
نیشنل پولیس اکیڈمی میں زیرِ تربیت اے ایس پیز سےخطاب کرتے ہوئے وفاقی وزیر داخلہ کا کہنا تھا کہ موجودہ پولیس بیچ کو بین الاقوامی معیار کے مطابق تیار کیا جائے گا،پولیس ٹریننگ میں جدید تقاضوں کے مطابق نئے تربیتی ماڈیولز شامل کیے جائیں گے تاکہ افسران مستقبل کے چیلنجز سے مؤثر انداز میں نمٹ سکیں۔
محسن نقوی نے اعلان کیا کہ اے ایس پیز کو ایک ماہ کی خصوصی تربیت کے لیے چین بھی بھیجا جائے گا۔ پولیس افسران کی مالی مشکلات دور کرنے کے لیے عملی اقدامات کیے جا رہے ہیں اور وہ چاہتے ہیں کہ ہر پولیس افسر کی تنخواہ بہتر ہو۔
وفاقی وزیر داخلہ نےمزید کہا کہ نیشنل پولیس فاؤنڈیشن کےتعاون سے پولیس افسران کو جدید سہولیات فراہم کی جائیں گی جبکہ ترقی سے متعلق مسائل بھی جلد حل کیے جائیں گے۔ دورے کے دوران محسن نقوی نے نیشنل پولیس اکیڈمی میں جاری تزئین و آرائش کے کام کا معائنہ بھی کیا،کانفرنس ہال، ڈائننگ ہال اور دیگر کمروں کا جائزہ لیا اور کمانڈنٹ کو موقع پر ہی ضروری ہدایات جاری کیں۔
