مغربی ہواؤں کا سلسلہ آج سے ملک میں داخل ہونے کا امکان ہے جس سے آئندہ چند روز میں مختلف شہروں میں وقفے وقفے سے بارشوں کا امکان ہے۔
محکمہ موسمیات کے مطابق مغربی ہواؤں کا سلسلہ آج سے ملک میں داخل ہوگا۔ 31 دسمبر کو یہ سلسلہ ملک کے بالائی اور وسطی علاقوں کو اپنی لپیٹ میں لے گا۔ آج سے 31 دسمبر کو بلوچستان کے مختلف علاقوں میں بارش اور پہاڑوں پر برفباری کا امکان ہے۔
بیان کے مطابق 30 دسمبر سے یکم جنوری کے دوران خیبرپختونخوا اور میدانی علاقوں میں بارش اوربرفباری متوقع ہے۔ پنجاب اوراسلام آباد، مری، گلیات، میدانی علاقوں میں 30 دسمبر سے دو جنوری تک بارش اور برفباری ہوسکتی ہے۔
نیشنل ڈیزاسٹر مینجمنٹ اتھارٹی نے اگلے دو سے تین روز کے دوران ممکنہ موسمی صورتحال کے حوالے سے ایڈوائزر ی جاری کر دی ہے۔ آج رات ملک میں داخل ہونے والی مغربی ہواؤں کے باعث بیشتر علاقوں میں بارش جبکہ پہاڑی علاقوں میں برفباری متوقع ہے، جس کی شدت 30 دسمبر کو مزید بڑھنے کا امکان ہے۔
موسمی حالات کے پیش نظر ناران، کاغان، سوات، دیر، کوہستان، مری، گلیات، اسکردو، ہنزہ اور دیگر پہاڑی علاقوں میں برفباری کے ساتھ رابطہ سڑکوں کی بندش کا خدشہ بھی موجود ہے۔ این ڈی ایم اے نے خبردار کیا ہے کہ بالائی خیبرپختونخوا، گلگت بلتستان اور آزاد کشمیر کے پہاڑی علاقوں میں لینڈ سلائیڈنگ اور برفانی تودے گرنے کے خطرات بڑھ سکتے ہیں۔
وسطی و جنوبی پنجاب اور بالائی سندھ میں بارش کے باعث دھند میں کمی متوقع ہے۔ این ڈی ایم اے نے عوام، سیاح اور مسافروں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی ہے۔
