پاکستان نے امریکا کی جانب سے ایف 16 کی اپ گریڈیشن کیلئے امداد کے فیصلے خیر مقدم کیا ہے۔
اسلام آباد میں ہفتہ وار میڈیا بریفنگ کے دوران ترجمان دفتر خارجہ طاہر حسین اندرانی نے کہا کہ امریکا کی جانب سے ایف سولہ کی اپ گریڈیشن کیلئے امداد کے فیصلے کا خیر مقدم کرتے ہیں۔
ترجمان دفتر خارجہ نے کہا کہ افغانستان میں علماء کی جانب سے منظور ہونے والی قرارداد کا مسودہ نہیں دیکھا، افغانستان نے اس طرح کے وعدے ماضی میں بھی کئے ہیں۔ سوال یہ ہے کہ کیا اس پر عمل درآمد کیا گیا؟ پاکستان نے افغانستان سے تحریری گارنٹی مانگی ہے مگر افغان طالبان کی جانب سے تحریری گارنٹی نہیں دی گئی۔ ہم افغان علماء کے بیان کو دیکھیں گے اور اس کا جائزہ لیں گے۔
طاہر حسین اندرانی کا کہنا ہے کہ بھارت کی جانب سے پاکستان کے خلاف ریاستی پشت پناہی میں دہشت گردی جاری ہے۔ ہم بھارتی وزیر دفاع کے حالیہ نفرت انگیز متنازعہ بیان کی شدید مذمت کرتے ہیں، پروپیگنڈے کے ذریعے حقائق کو مسخ نہیں کیا جا سکتا ۔افواج پاکستان ملک کے تحفظ کیلئے پرعزم ہیں۔
