فیلڈ مارشل سید عاصم منیر کا کہنا ہے کہ پاکستان امن کا خواہاں ہے۔ ملکی خود مختاری اور وطن کے دفاع کیلئے پرعزم ہیں۔
ہنگور ڈے کے موقع پر اپنے پیغام میں فیلڈمارشل سید عاصم منیر نے کہا کہ 9 دسمبر 1971 آج تک دشمن کے ذہن پر نقش ہے۔ ہنگور کے عملے نے جانبازی اور دلیری کی تاریخ رقم کی۔ ہنگور نے دشمن کے بحری جہاز ککری کو غرق اور کرپان کو شدید نقصان پہنچایا۔ ہنگور نے بھارتی بحری غرور خاک میں ملایا۔ 1971 میں بھی پاک بحریہ سیسہ پلائی دیوار تھی آج بھی ہے۔
سربراہ پاک بحریہ ایڈمرل نوید اشرف نے کہا پاک بحریہ ہر محاذ پر دشمن کے دانت کھٹے کرنے کیلئے تیار ہے۔ ہنگور کی درخشاں روایت برقرار رکھتے ہوئے 8 جدید ہنگور کلاس آبدوزیں عنقریب پاک بحریہ میں شامل ہو رہی ہیں۔
واضح رہے کہ پاک بحریہ آج کا یادگار دن ’ہنگور ڈے‘ کے طور پر منارہی ہے، یہ دن آبدوز ہنگور کی لازوال بہادری اور پاکستان کے ناقابلِ تسخیر دفاع کی روشن علامت ہے۔ 9 دسمبر 1971 کو ہنگور نے دشمن کے بحری جہاز ککری کو غرق اور کرپان کو شدید نقصان پہنچا کر بھارتی بحری غرور خاک میں ملایا۔ ہنگور ڈے پر پاک بحریہ کی خصوصی دستاویزی فلم ہدف جاری کردی گئی۔
