نیپرا نے چار سال قبل ہونے والے ملک گیر بلیک آؤٹ کے حوالے سے تفصیلی فیصلہ جاری کرتے ہوئے نیشنل گرڈ کمپنی اور سی پی پی اے کو بروقت بجلی بحال نہ کرنے کا ذمہ دار قرار دے دیا جبکہ نیشنل گرڈ کمپنی اور سی پی پی اے پر،ڈھائی،ڈھائی کروڑ روپے جرمانہ عائد کر دیا گیا ۔
فیصلے میں کہا گیا ہے کہ 9 جنوری 2021 کو ملک بھر میں 20 گھنٹے تک بجلی معطل رہی جبکہ بلیک آؤٹ کے بعد فوری طور پر بحالی کا عمل مکمل طور پر ناکام رہا۔ نیپرا کے مطابق 2021، 2022 اور 2023 کے دوران بھی بجلی بندش کے متعدد واقعات سامنے آئے، جن میں دونوں کمپنیوں کی ناقص کارکردگی ثابت ہوئی۔
اتھارٹی نے بلیک آؤٹ کے معاملے پر تحقیقاتی کمیٹی تشکیل دی تھی، تاہم نیشنل گرڈ کمپنی اور سی پی پی اے نیپرا کو مطمئن کرنے میں ناکام رہیں اور دونوں نے ذمہ داری ایک دوسرے پر ڈالنے کی کوشش کی۔
نیپرا نے نیشنل گرڈ کمپنی اور سی پی پی اے پر ڈھائی، ڈھائی کروڑ روپے جرمانہ عائد کرتے ہوئے دونوں اداروں کو پندرہ روز کے اندر جرمانہ ادا کرنے کا حکم دے دیا۔
