وزارتِ دفاع نے چیف آف ڈیفنس فورسز کی تقرری اور ایئر چیف کی مدتِ ملازمت میں توسیع کے باضابطہ نوٹیفکیشن جاری کردیے۔ جنرل سید عاصم منیر کو 5 سال کے لیے چیف آف ڈیفنس فورسز کا چارج دے دیا گیا۔ ایئر چیف ظہیر احمد بابر کی دو سالہ توسیع کا اطلاق 19 مارچ 2026 سے ہوگا۔
وزارتِ دفاع نے چیف آف ڈیفنس فورسز کی تعیناتی اور ایئر چیف کی مدتِ ملازمت میں توسیع سے متعلق دو الگ نوٹیفکیشن جاری کیے۔ نوٹیفکیشن میں کہا گیا کہ صدرِ پاکستان نے وزیراعظم کی ایڈوائس پر جنرل سید عاصم منیر کی بطور آرمی چیف تقرری کی منظوری دی، جبکہ انہیں چیف آف ڈیفنس فورسز کا چارج بھی دے دیا گیا۔ ان کی مدتِ تقرری 5 سال مقرر کی گئی ہے۔
وزارتِ دفاع نے یہ نوٹیفکیشن آرمی ایکٹ اور آئین کے آرٹیکل 243 کے تحت جاری کیا۔اسی طرح ایئر چیف مارشل ظہیر احمد بابر کی مدتِ ملازمت میں دو سال توسیع کا نوٹیفکیشن بھی جاری کر دیا گیا، جس کا اطلاق 19 مارچ 2026 سے ہوگا۔
ایئر چیف ظہیر احمد بابر کو یہ توسیع آئین کے آرٹیکل 234 اور پاکستان ایئر فورس ایکٹ کے تحت دی گئی، جبکہ نوٹیفکیشن کی کاپیاں صدر، وزیراعظم، تینوں سروس چیفس اور متعلقہ اداروں کو ارسال کر دی گئیں۔
وزیراعظم شہباز شریف نے فیلڈ مارشل عاصم منیر کو چیف آف ڈیفنس فورسز مقرر ہونے پر مبارکباد دیتے ہوئے کہا کہ جدید جنگی تقاضوں سے ہم آہنگ یہ تعیناتی قومی دفاع کے لیے اہم ہے۔ ایئر چیف ظہیر احمد بابر سدھو کی مدتِ ملازمت میں توسیع پر بھی نیک خواہشات کا اظہار کیا۔
وزیراعظم شہباز شریف نے کہا کہ فیلڈ مارشل عاصم منیر کی سربراہی میں ہماری بہادر افواج نے معرکۂ حق میں دشمن کو عبرتناک شکست دی، جس سے پاکستان کا نام پوری دنیا میں روشن ہوا۔
وزیراعظم نے چیف آف ایئر اسٹاف ظہیر احمد بابر سدھو کو مدتِ ملازمت میں توسیع پر بھی مبارکباد دی اور کہا کہ ان کی قیادت میں پاک فضائیہ نے معرکۂ حق میں دشمن پر بھرپور دھاک بٹھائی۔ وزیراعظم نے اس عزم کا اظہار کیا کہ ملکی دفاع، ترقی اور خوشحالی کے لیے تمام ادارے مل کر کام کریں گے اور پاکستان کے دفاع کو مل کر ناقابلِ تسخیر بنائیں گے۔
