بلوچستان میں دہشتگردی کا بڑا منصوبہ ناکام ہوگیا،ضلع زیارت میں لیویز اور ضلعی انتظامیہ نے بروقت کارروائی کرتےہوئے پانچ دہشت گردوں کو گرفتارکرلیا،گرفتار دہشتگردوں کا تعلق افغانستان سے ہے۔
ڈپٹی کمشنر زیارت کےمطابق زیارت میں ضلعی انتظامیہ اورلیویز فورس نےدہشتگری کا بڑا منصوبہ ناکام بنادیا ۔ مشترکہ کاروائی کے دوران 5 دہشت گردوں کوسپیرا رغہ لیویز چیک پوسٹ سے گرفتار کیا گیا،جن کا تعلق قندہار، افغانستان سے بتایا جاتا ہے۔
ان کا کہنا ہے کہ ملزمان کے قبضے سے بھاری مقدار میں اسلحہ و گولہ بارود اور مواصلاتی آلات برآمد ہوئے۔ جن میں 11 ہینڈ گرینیڈ، 3 ایس ایم جیز، 2 ایم فور رائفلز (پارٹس کی صورت میں)، ایک گرینیڈ لانچر، 9 ایم فور میگزینز، 14 ایس ایم جی میگزینز، 420 ایس ایم جی راؤنڈز، 230 ایم فور راؤنڈز، ایک کلو بارودی مواد، 6 وائرلیس سیٹس، 4 موبائل فونز، 2 آر پی جیز، ایک ڈگر، 13 ایمونیشن بیگز، 16 پاور سیلز، 15 ایس ایم جی گرینیڈز، ایک سوزوکی کیری وین، ایک موٹر سائیکل اورکالعدم تنظیم ٹی ٹی پی کا لٹریچر شامل ہے
وزیر اعلیٰ بلوچستان میرسرفراز بگٹی نےکامیاب کارروائی پرڈپٹی کمشنر زیارت، لیویز فورس اور ضلعی انتظامیہ کی کارکردگی کوسراہا،کہاکہ بلوچستان کےعوام کے تحفظ کے لیےسیکیورٹی اداروں کی قربانیاں اور بروقت اقدامات قابلِ فخر ہیں۔
وزیراعلیٰ نےمزیدکہا کہ دہشت گردی کےخلاف جنگ میں ایسے آپریشنز امن دشمن عناصر کےعزائم کو ناکام بنانےمیں اہم کردارادا کرتےہیں،ان کےمطابق حکومتِ بلوچستان صوبےمیں امن واستحکام کے لیے تمام وسائل استعمال کررہی ہےاور قانون نافذ کرنے والے اداروں کی بھرپور پشت پر کھڑی ہے۔
