چیف جسٹس وفاقی آئینی عدالت امین الدین خان کا کہنا ہے کہ ایساعدالتی فورم چاہتے ہیں،جو دیانت،غیرجانبداری کی اعلیٰ مثال ہو۔
وفاقی آئینی عدالت کے قیام کے بعد چیف جسٹس امین الدین خان نے پہلا پیغام میں بنیادی حقوق کا تحفظ آئینی عدالت کی اولین ترجیح، شفافیت اور عوامی رسائی کواہم سنگِ میل قراردیا۔ عزم ظاہر کیا کہ ایک ایسا عدالتی فورم قائم کرنا چاہتے ہیں جو غیرجانبداری، دیانت اور علمی بصیرت کی اعلیٰ مثال ہو۔
چیف جسٹس وفاقی آئینی عدالت جسٹس امین الدین خان نے کہا آئینی عدالت کا قیام قومی آئینی جدوجہد میں ایک اہم سنگِ میل ہے۔ یہ اقدام آئین اور قانون کی حکمرانی کے دیرپا وعدے سے اجتماعی وابستگی کی تجدید کرتا ہے۔
جسٹس امین الدین خان نے کہا کہ اس عدالت کا کردار ایک مقدس امانت ہے۔ جو شہریوں کی زندگیوں، آزادیوں اور امنگوں پر براہِ راست اثر انداز ہوتی ہے۔ آئینی عدالت میں آنے والا ہر معاملہ آئین کی بالادستی، انصاف کے اصولوں اور منصفانہ اندازمیں نمٹایا جائے گا۔
انہوں نے مزید کہا کہ ایسی عدالتی روایت تشکیل دینا چاہتے ہیں جو مدلل فیصلوں، ادارہ جاتی وقار اور عوامی اعتماد پر مبنی ہو، دلی خواہش ہے کہ وفاقی آئینی عدالت آئینی بالادستی کی محافظ اور آنے والی نسلوں کے لیے عدل و انصاف کی ایک مضبوط علامت بن کر قائم رہے۔
