اقوام متحدہ میں پاکستانی مستقل مندوب عاصم افتخار کا کہنا ہے کہ یوکرین روس جنگ کے حوالے سے پاکستان کوخدشات ہیں۔ تنازع کے علاقائی اوربین الاقوامی سطح پر گہرے اثرات مرتب ہورہے ہیں۔
سلامتی کونسل اجلاس میں اظہارخیال کرتے ہوئے عاصم افتخار نے کہا کہ یوکرین روس جنگ جنگ کے نتیجے میں انسانوں کومشکلات کا سامناہے، سول انفرااسٹرکچر کو نشانہ بنانے کے حوالے سے تحفظات ہیں، عالمی قوانین کے تحت شہریوں، انفرااسٹرکچر کی حفاظت یقینی بنائی جائے۔
عاصم افتخار نے کہا کہ خونریزی فریقین کوتنازع کے حل کےقریب جانے سے روک رہی ہے، فریقین سے اپیل ہےکہ تحمل اور برداشت کا مظاہرہ کریں، دونوں فریقین تصادم اورکشیدگی کےخاتمےکی طرف بڑھیں۔ مذاکرات سےحل کیلئےکی جانےوالی تمام کوششوں کی حمایت کرتے ہیں۔
ان کا مزید کہنا تھا کہ اس سال کےشروع میں مذاکراتی مومنٹم شروع ہواتھا، اگراس کو سنجیدہ لیاجاتا تو شاید کسی نتیجےپرپہنچ جاتے، ٹرمپ کی اس جنگ کوروکنےکی کوششیں تاحال نتائج کی منتظر ہیں، ایساحل جو دونوں فریقین کیلئے قابل قبول ہوبندوقوں کو خاموش کرسکتاہے۔
اقوام متحدہ میں پاکستانی مستقل مندوب نے کہا کہ اس جنگ کا کوئی فوجی حل نہیں ہے، دونوں فریق مذاکرات کی میز پر مسائل حل کریں، تنازع کے حل کیلئے مذاکرات کیے جائیں، پاکستان ڈائیلاگ اور سفارتکاری کے ذریعے تنازعات کے حل کاحامی ہے۔
