الیکشن کمیشن آف پاکستان نے قومی و صوبائی اسمبلی کے ضمنی انتخابات میں حصہ لینے والے تمام امیدواروں اور سیاسی جماعتوں کو انتخابی ضابطہ اخلاق پر مکمل عملدرآمد کی ہدایت کی ہے۔
ترجمان صوبائی الیکشن کمشنر پنجاب کے مطابق امیدواروں کی توجہ الیکشن ایکٹ 2017 کی شق 182 کی طرف مبذول کرائی گئی ہے، جس کے تحت پولنگ ڈے سے قبل 48 گھنٹوں کے دوران یعنی پولنگ کے اختتام تک آنے والی نصف شب تک حلقے کی حدود میں کسی بھی قسم کے عوامی اجتماع، جلسے، جلوس یا ریلی کا انعقاد، شرکت یا اس کی ترغیب دینا قانونا ممنوع ہے، قانون شکنی پر دو سال تک قید، ایک لاکھ روپے تک جرمانہ یا دونوں سزائیں دی جا سکتی ہیں۔
خیال رہے کہ این اے18 ہری پور،این اے 96، 104، 129، 143، 185 میں ضمنی انتخابات اتوار کو ہوں گے۔ پی پی 73 سرگودہا،پی پی 87 میانوالی،پی پی 98 فیصل آباد،پی پی 115،116 فیصل آباد میں ضمنی الیکشن ہوگا۔ پی پی 203 ساہیوال ،پی پی 269 مظفرگڑھ میں بھی ضمنی انتخابات کیلئےپولنگ 23 نومبر کو ہوگی۔
