پاکستان پیپلز پارٹی بلوچستان کے صدر اور سینیٹر سردار محمد عمر گورگیج نے وزیر اعلیٰ بلوچستان سرفراز بگٹی کی تبدیلی سے متعلق چلنے والی خبروں کی سختی سے تردید کرتے ہوئے انہیں غیر ذمہ دارانہ، گمراہ کن اور بے بنیاد قرار دیا ہے۔
سردار عمر گورگیج کا کہنا ہے کہ وزیر اعلیٰ بلوچستان کے حوالے سے نشر ہونے والی اطلاعات میں قطعاً کوئی صداقت نہیں اور پیپلز پارٹی اس طرح کی خبروں کو مکمل طور پر مسترد کرتی ہے۔انہوں نے کہا کہ پارٹی کے کسی رہنما، کسی فورم یا کسی بھی تنظیمی سطح پر وزیر اعلیٰ کی تبدیلی سے متعلق نہ کوئی فیصلہ ہوا ہے اور نہ ہی کوئی غور و فکر جاری ہے۔
انہوں نے کہا کہ ایسی افواہیں صرف بے چینی اور غلط فہمیاں پھیلانے کے لیے جاری کی جاتی ہیں جن کا حقیقت سے کوئی تعلق نہیں۔سینیٹر سردار عمر گورگیج نے واضح کیا کہ پیپلز پارٹی صوبے میں سیاسی استحکام، اچھی حکمرانی اور عوامی خدمت کے تسلسل پر یقین رکھتی ہے اور صوبائی حکومت اتحادی جماعتوں اور تمام اسٹیک ہولڈرز کے ساتھ مل کر استحکام اور ترقی کے ایجنڈے پر کام کر رہی ہے۔
انہوں نے کہا کہ پارٹی کسی بھی نامکمل یا غیر سنجیدہ اطلاع پر مبنی رپورٹ کو سختی سے رد کرتی ہے۔ اگر پارٹی کی جانب سے کوئی بھی پالیسی فیصلہ کیا گیا ہوتا تو اسے باضابطہ اعلان کے ذریعے سامنے لایا جاتا ۔
