اپوزیشن لیڈر پنجاب اسمبلی کی پنجاب لوکل گورنمنٹ ایکٹ 2025 کے متعدد سیکشنز کے خلاف دائر درخواست پر پنجاب حکومت، سیکرٹری لوکل گورنمنٹ سمیت دیگر فریقین کو نوٹس جاری کر دیے گئے۔
لاہور ہائیکورٹ کے جسٹس سلطان تنویر نے معین رضا قریشی سمیت دیگر کی درخواست پر سماعت کی۔ درخواست بیرسٹر ابوذر سلمان خان نیازی کے توسط سے دائر کی گئی درخواست میں مؤقف اختیار کیا گیا کہ لوکل گورنمنٹ ایکٹ 2025 میں بیوروکریسی کو اختیارات دینا آئین کے آرٹیکل 140 اے کی خلاف ورزی ہے۔
درخواست میں مؤقف اختیار کیا گیا ہے کہ آئین کے آرٹیکل 140 اے کے تحت اختیارات منتخب نمائندوں کو منتقل ہونا لازمی ہیں۔ غیر جماعتی انتخابات آئین کے آرٹیکل 17 کی خلاف ورزی ہیں۔ آرٹیکل 17 شہریوں کو تنظیم سازی اور وابستگی کی آزادی کی ضمانت دیتا ہے۔ لوکل گورنمنٹ ایکٹ 2025 عوامی نمائندگی کے اصولوں سے متصادم ہے۔
درخواست میں استدعا کی گئی کہ عدالت لوکل گورنمنٹ ایکٹ کے سیکشن 25،32،35،40 اور 55 کو کالعدم قرار دے۔ عدالت نے پنجاب حکومت، سیکرٹری لوکل گورنمنٹ سمیت دیگر فریقین کو نوٹس جاری کرکے جواب طلب کرلیا۔
