پنجاب حکومت نے پانچ سو کے وی اے سے زائد بجلی استعمال کرنے والے صارفین پر بجلی ڈیوٹی عائد کرنے کا فیصلہ کرلیا ۔
پنجاب حکومت نے فنانس ترمیمی بل دو ہزار پچیس کمیٹی کو بھجوائے بغیر پنجاب اسمبلی سے منظور کروا لیا ، گزشتہ روز منظور ہونے والے بل کی کاپی سماء نیوز نے حاصل کرلی ۔
بل کے متن کے مطابق پانچ سو کے وی اے سے زائد بجلی استعمال کرنے والے صنعتی و کمرشل صارفین پر بجلی ڈیوٹی لاگو ہوگی ۔ بجلی ڈیوٹی فی یونٹ چار پیسے ہو گی ۔ پانچ سو کے وی اے تک بجلی استعمال کرنے والے صنعتی و کمرشل صارفین کو بجلی ڈیوٹی سے استثنیٰ حاصل ہو گا ۔ پانچ سو کے وی اے سے بڑے جنریٹر رکھنے والے ادارے ٹیکس نیٹ میں لائے جائیں گے تمام گھریلو صارفین بجلی ڈیوٹی سے مکمل مستثنیٰ ہوں گے ۔
نیشل گرڈ کے صنعتی و کمرشل صارفین سے بجلی ڈیوٹی ڈسکوز کے ذریعے وصول کی جائے گی ، نجی بجلی استعمال کرنے والے صنعتی و کمرشل صارفین سے الیکٹرک انسپکٹرز کے ذریعے بجلی ڈیوٹی وصول کی جائے گی ، مجوزہ قانون کا اطلاق کمرشل اور صنعتی شعبے پر ہوگا ، بل کی حتمی منظوری گورنر پنجاب دیں گے ۔
